«Крепость» абураб рагъухъабазул клубалъул командаялда гъорлъ цеве вахъуна
ЛъагIалида жаниб цо-кIиго сордо букIуна игьелдерил чанго минуталъ телевизоразул экраназда цере хIухьел ккун гIодор чIараб. ГIисинал-чIахIиял, бихьинал-руччаби, кинаб бугониги спорталдехун рокьи-хурхен гьечIелги ракIарула росуцояв, жубараб речIчIухъанлъиялъул рахъалъ гIемер батIи-батIиял рингазда бергьенлъаби росарав Халид МуртазагIалиевасул иргадулаб дандчIваялъухъ балагьизе. ЧIухIиялъеги рохалиеги гIурхъи букIунаро щивасе гьениб судияс Халидил кверги эхеде борхун, иргадулаб нухалъги гьев бергьиналъул хIакъалъулъ ахIулеб рагIараб мехалда. Хасго батIияб асар гьабула цIараб заман лъугIилалдего яги чанго секундалда жаниб гьес, дандияв нокауталдеги ккезавун, къокъидго бергьенлъи босидал.
Халид МуртазагIалиев гьавуна 1993 соналда, эмен АсхIабгIалицаги эбел ГIаишатицаги бетIербахъиялъе ва хIалтIи-пишаялъе бигьаяб бакIилан тIасабищараб республикаялъул тахшагьаралда. ЦIалана №22 школалда ва 2010 соналда, хадубккунисеб цIали гьабуна Новочеркасск шагьаралъул ЮРГТУ (НПИ) университеталъул энергетикаялъул факультеталда. Гьениб спорталъул рахъалъ Халидил гьунар бихьун, гьев ахIана Ростов шагьаралъул экономикаялъул ва правоялъул колледжалде. Хадубги лъугIизабуна Ростовалда экономикаялъул ва правоялъул институталъул юридикияб факультет. ГьабсагIаталда Халид ккола гьебго институталъул экономикияб факультеталъул студент.
16 нухалда цеве вахъана Халид профессиональнияб рингалда ва 14 нухалда бергьана. Гьезда гьоркьоса 12 дандчIвай лъугIана цIараб заман лъугIилалдего, нокауталде дандиявги витIун. Бищунго захIматаблъун букIанилан бицана Халидица, ГIахьвахъа Абусупян ГIалихановасулгун букIараб къеркьей. КIиябго нухалда гьевгун вагъулагоги къуна. Щиб гьабилеб, гьединаб жо буго спорт, гьединабго жо буго нилъер гIумруги: жакъа рохел, метер къварилъи, кинабго БетIергьанасдасан бугелъул сабруялъе къуват гIезе ккола.
Халид ккола M-I FIAHTER абураб реалити-шоуялъул чемпион. Гьединго Халид ккола жубараб речIчIухъанлъиялъул рахъалъ дунялалъул чемпионги спорталъул мастерги. Гьев цеве вахъуна «Крепость» абулеб Москваялъул рагъухъабазул клубалъул командаялда гъорлъ, 84 кг цIайиялда. Хадурккунисел планазул цIехедал, гьес абуна жинда бараб жо щибго букIунарила, клубалъул нухмалъулез «жейин» абурабго, рингалде вахъине хIадурго вукIине кколилан.
Россиялда тIоцебе тIобитIулеб UFCялъул къецазда американав Си Би Доллоуэйида данде рихьизарурал: цин ГIумари АхIмадов, хадув Артём Фролов унтидал, къец байбихьизе анкь хутIараб мехалъ, хIадуризе заман дагьаб букIаниги, американасе жаваб гьабуна Халидица. Гьедин, ракIалдаго гьечIого Халид МуртазагIалив тIоцеве гIахьаллъана UFCялъул къецазда. ТIоцебесеб раундалдаго Халидица дандиясда тIад бергьенлъиги босана, амма судья Дин Хербица рагъ чIезабичIо. Гьелдаса балагьаралги, эксперталги, живго Доллоуэйги рази рукIинчIо. Рагъ чIезабуна 2-абилеб раундалда, Халидица дандияв нокауталде ккезавидал.
Эбел-инсул, гIагарлъиялъул кинаб бербалагьи букIунеб, рази рукIунищ гьел дуца тIасабищараб спорталъул тайпаялдасайин абун гьикъидалги, Халидица къокъго тIасабихьизабуна, цохIо эбел йикIунилаха те гьеб ишилан абун. ГIайиб щибха, бицинейищ ккелеб лъималазул ургъалабаз «зазда чIараб хIанчIил» гIадин букIунеб улбузул ракIазул. Амма иргадулаб бергьенлъиялъ кинабго кIоченабулеб батилинги тола дица.
Жеги гIураб къуват-жангун, гIолохъанлъиялъул болъодул цересел хIокIаздаго вуго Халид МуртазагIалиев. Дие бищунго рекIее гIуна гьесул гIамалалъулъ чIухIа-къули, цо-цо гьединазулъ букIунеб гIадинаб гIамалкIодолъи гьечIолъи. Шагьаралда гьавурав, гIурав вугониги, гIагараб магIарул мацIалдехун бугеб бербалагьиги, хIатта игьелдерил лугъат-чвахиги цIунун гьес гьеб бицунеб куц бихьидалги, рухIдаллъизе бачIана.
Магьди ГIабдурахIманов
