Бухаресталда тIобитIана эркенаб гугариялъул рахъалъ Европаялъул чемпионат
Эркенаб гугариялъул рахъалъ гъоркьиса Будапешталда букIараб Европаялъул чемпионаталда Россиялъул тIасабищараб командаялъ рихьизарун рукIана лъикIал хIасилал, ай щун букIана ункъо меседил медаль.
Исана, дагьаб цебе Румыниялъул Бухаресталда тIобитIараб гьебго спортивияб тайпаялъул рахъалъ Европаялъул чемпионаталда гIицIго кIиго меседил медаль гурони щвечIо нилъеразе, гьебги тIасабищараб командаялъул капитан ГIабдурашид Садулаевасе (97 кг) ва Владислав Валиевасе (86 кг). 57 ва 74 кг цIайиязда дунялалъул чемпионал Заур Угуевгун Заурбек Сидаков, батIи-батIиял гIиллабаздалъун, чемпионаталда гIахьаллъичIо. Гьезул бакIалда церерахъарал Муслим Садулаевасегун Тимур Бижоевасе щвана гIарцулгун мазгарул медалал.
Дунялалъул чемпион МухIамадрасул ГъазимухIамадовги ун вукIана Бухаресталде, амма дагьаб цебе гьесие ккун букIараб сакъатлъиялъ квалквал гьабуна меседил медаль босизе. Гьесги гIей гьабуна мазгарул медалалда.
ГIабдурашид Садулаевасин абуни, континенталиял къецаздаги такрар гьабуна дунялалъул чемпионаталда ккарабго хIасил. Абизе ккола, финалалде ГIабдурашид ворчIана гIемер гIакъуба бихьичIого. Амма финалалда «Россиялъул танкасе» Белоруссиялдаса Александр Гуштынгун гугаризе дагьаб захIмалъана ва 3:1 хIисабгун бергьана. РечIчIиялдаса хадуб ГIабдурашидица бицана чемпионаталда цере ккун рукIарал сакъатазул ва гьез тIубараб куцалда гьелде хIадурлъизе течIолъиялъул.
Владислав Валиевасги щуго къеркьеялда цо очко гурого кьечIо дандиязе. Кинабниги 30:1 хIасилгун вахъана гьев Европаялъул чемпионлъун.
79 кг цIайиялдаги рес букIана россиялъулазул меседил медаль босизе. Амма бащдаб финалалъул къеркьеялда сакъатлъи ккарав АхIмад ХIажимухIамадовасухъа бажаричIо финалияб дандчIваялде вахъун.
Бищунго бакIаб (125 кг) цIайиялда улкаялъул командаялъул гугарухъан Анзор Хизриевасги гIей гьабуна мазгарул медалалда. ПалхIасил, щварал медалазул рахъалъ Россиялъ, командабазда гьоркьоб, ккуна тIоцебесеб бакI. ГIицIго меседил медалал хIисабалде росани, Турциягун Азербайжан нилъер командаялдаса цере ккана.
Бухаресталда ккарал хIасилазул хIакъалъулъ гьадин бицана эркенаб гугариялъул рахъалъ Россиялъул тIасабищараб командаялъул тренер Дзамболат Тедеевас: «Европаялъул чемпионаталда командаялъ рихьизаруна гьоркьохъел хIасилал. Олимпиялъул хIаязде гугарухъаби хIадуризе ккани бихьизе ккола щивасул загIипал ва къуватал рахъал. Дида гьел Бухаресталда рихьана ва лъала щиб гьабизе кколебали. Европаялъул чемпионаталда хIалбихьиял гьаризе бегьула, амма Олимпиадаялда гъалатIал риччазе лъилго ихтияр букIунаро. Абизе ккола, исанасеб Европаялъул чемпионат букIана къуватаб. Цебе гIадин тIасарищарал командабазул кIиабилелгун лъабабилел спортсменал гуреб, исана гьенире рачIун рукIана континенталъул бищунго къуватал атлетал», — ан.
