Москваялъул «Динамоялъулгун» хIасил бащадаб ккана
Премьер-лигаялда футболалъул рахъалъ Россиялъул чемпионаталъул 22-абилеб туралда анлъабилеб апрелалда Каспийскалда «Анжи» хIана Москваялъул «Динамо» командагун. ХIасил ккана 1:1. ТIоцебесеб таймалъул 16-абилеб минуталда «Динамоялъул» кавабахъе торгIо кьабуна «Анжиялъул» гьужумалъулав Андрес Понсеца. КIиабилеб таймалъул 73-абилеб минуталда жавабалъулаб торгIо майданалъул бетIергьабазул кабавахъеги кьабун, хIасил бащад гьабуна Тони Шуньичица – 1:1.
«Анжиялда» ва «Динамоялда» гьоркьоб хIай букIана хIалуцараб. Турниралъул таблицаялда ахIвал-хIал лъикIлъизабизелъун кIиябго командаялъе хIажат букIана бергьенлъи. Амма рекIее бокьараб хIасил командабазул ккечIо. Цебесеб туралда «Краснодар» командаялдаса 0:5 хIисабгун къун букIараб МухIамад Адиевасул командаялъе гьеб квешаб хIасил гьечIинги абизе бегьула.
«Анжи» командаялда бищунго лъикIав футболистлъун гьеб къоялъ вукIана голкипер Юрий Дюпин.
14 апрелалда, 23-абилеб туралда, «Анжи» хIазе буго чемпионлъун бахъине къеркьолеб Санкт-Петербургалъул «Зенит» командагун.
