Политикиял хIаял ва щакаб хIукму
ХIабиб НурмухIамадовасулгун гара-чIвари гьабуна «Матч ТВ» телеканалалъул корреспондентас
Гьал къоязда тIадагьаб цIайиялда UFCялъул чемпион ХIабиб НурмухIамадов гьоболлъухъ щвана «МАТЧ ТВ» федералияб каналалъул студиялде. Гьениб спортсменасулгун гара-чIвари гьабуна машгьурав спортивияв журналист Дмитрий Губерниевас.
— UFCялъул мун гIахьаллъараб ахирисеб къеркьеялда ккараб тунка-гIусиялда бан, Невадаялъул атлетикияб комиссиялъ хIукму къотIана. Гьелда рекъон дуе изну гьечIо ичIго моцIалъ октагоналде вахъине, ва гIакIадуе къотIана 500 азарго доллар. Гьелда бан щиб абилеб?
— ХIукму гьединаб букIине бугеблъи гIага-шагарго лъалеб букIана. Амма Невадаялъул атлетикияб комиссиялда кинго бичIчIичIо тунка-гIусиялъе кьучI лъурав чи дун вукIинчIеблъи. Гьеб байбихьана Макгрегорица ва гьесул командаялъ. Дицайин абуни ахир лъуна. Цоги рази гьечIеб хIужа ккола, дир командаялъул спортсменал Зубайра ТухIуговгун Абубакар НурмухIамадов лъагIалил болжалалда турниразда гIахьаллъизе гьукъи. Гьезие октагоналда къеркьезе ихтияр кьечIого, дунги гьениве вахъунаро.
— Дур эмен ГIабдулманап НурмухIамадовас рикIкIунеб буго Конор Макрегорие ва гьесул командаялъе къотIараб хIукму тамахаб бугилан, ай ирландиялъулав октагоналде вахъине гьечIо бащдаб лъагIелалъ ва гьес гIакIадуе кьезе ккола гIицIго 50 азарго доллар. Дуда кин кколеб?
— Инсул пикруялда тIадрекъола. Конорица гIакIадуе кьезе ккола дидаса анцIго нухалъ дагьаб гIарац. Дир хIисабалда, гьеб буго ургъунго гьабураб иш, политикиял хIаял. UFCялъул чемпионлъун вахъиндал бичIчIана дида нилъер пачалихъалъул спортсменазда данде политика хIалтIизабулеб букIин.
— Мун тIаса лъугьине ккани, Макгрегорица щиб гьабизе кколеб?
— Дица гьадин абила — бокьарав лагъасдаса Аллагьцин тIаса лъугьунеб мехалъ, гIадам гIадамасдаса щай лъугьине бегьулареб. БукIана ццим ва гьеб гIодоб къана къеркьеялдаса хадуб. Киназдаго бихьана ХIабиб щив, Макгрегор щив кколелали. ГьабсагIаталда гьесдаги дидаги гьоркьоб рекъел ккезе бугищали лъаларо, амма хадубккун бокьараб букIине бегьула.
— UFCялъул президент Дана Уайтица цин абулеб букIана мунги дур командаги гьесул гIуцIиялдаса нахъе къотIизе кколин. Гьенже ахIи балеб буго тамихI цIакъго кьварараб бугин. Гьесул рахъалъ щиб абилеб?
— Гьев дида гIицIго бизнесмен хIисабалда гурого лъаларо ва гьесул гIамал-хасияталъе къимат кьезе захIмалъизе буго. UFC тун къватIивехун яхI-намус бугев чилъун ватизе бегьулелъул гьев. ЗахIматаб заманалда гIезегIан кумекги гьабуна Данаца дие, цо-цо мехалъ ахIвал-хIал хIалуцинеги гьабулеб букIана. Гьединлъидал, гьесул хIакъалъулъ лъикIав-тIокIавин ялъуни квешав-хашавин абизе кIоларо.
— UFC гIуцIиялда дуе дандекколарел рахъал ругищ?
— Руго. БичIчIула гьеб коммерческияб гIуцIи ва гьелъул бищунго аслияб масъала гIарац гьаби букIин. Амма микьго, ичIго къеркьеялда тIатIала бергьарал цо-цо спортсменал гьенир рачелалъе гIоло къеркьезе риччаларо, машгьурал гьечIиланги абун. Дидаги хъинтIана гьеб чанго соналъ цебе Эдди Алварезгун къеркьезе къотIи-къай гьабураб заманалда. Нижеда гьоркьоб рагъул трансляция телевидениялъул каналаз босичIого букIине бегьулинги абун, UFCялъ американасда данде виччана довго Макгрегор. Гьеб битIун гьечIо. ДагIба гьечIо, гIарац гьабизе бегьула, амма дунялалда жубараб речIчIухъанлъиялъул рахъалъ бищунго къуватаблъун рикIкIунеб спортивияб гIуцIиялда тIоцебесеб бакIалда спорт букIине ккеларищ.
— UFCялда гуреб цоги гIуцIиялъул турниразда цевевахъине ракIалда бугищ?
— ГьечIо. Цо-цо дие дандекколарел хIужаби рукIаниги, UFC ккола ММАялъул рахъалъ дунялалда бищунго къуватал турнирал тIоритIулеб гIуцIи. Бокьилаан гьенибго халатаб спортивияб нухалъе ахир лъезеги.
— Хадубккун щивгун къеркьезе бокьилеб?
— Жорж Сен-Пьергун. Гьев ккола кIиго цIайиялда UFCялъул вукIарав чемпион. Лъала гьев жубараб речIчIухъанлъиялъул рахъалъ цевевахъине завалалда гьечIеблъи, амма ММАялъул чIагояв легендагун дандчIвазе щвелин буго хьул. Тони Фергюсонилгунги буго рагIалде бахъинабизе кколеб иш. Гьединго ракIалда буго боксалъул рахъалъ Мейвезерилгун къуват борцинеги. ГIемерал чагIаз абулеб буго гьесукьа дун къолин, ХIабибил бокс загIипаб бугин. Дун гIуна къуватал спортсменазда гьоркьов ва щибаб къо байбихьулаан хIалбихьияздасан, къецаздасан. Кидаго гьездаса бергьун гурого къаси макьуги щолароан. Гьединлъидал, дие бокьилаан Флойдгун рингалде вахъине. ГIадамазеги букIина гьелъул кутакаб интерес. Щайгурелъул жегиги къей лъаларев кIиго спортсмен дандчIвалев вугелъул ва гьезул цоясул гурого судияс квер эхеде борхизе гьечIелъул.
— Ахирисеб къеркьеялдаса хадуб ВатIаналде тIадвуссингун мун дандчIвана улкаялъул президент Владимир Путингун. Гьес телефоналде ахIун бачIараб заманалда, хIакъаб жо, разилъун ватила.
— Дун цIакъ разилъана Макгрегоридаса бергьиндал букIараб гIала-гъважаялдаса хадуб гьес ахIун бачIиндал. Президентас дида гьикъана къваригIараб-хIажатаб ва баркана бергьенлъи. Пачалихъалъул бетIерас дур анцI-анцI саназул хIалтIуе, захIмат-гIакъубаги бихьун, бидулаб гIетIги тIун нахъа тараб нухалъе лъикIаб къимат кьей гьеб кIудияб жо ккола. Баркала буго Владимир Владимировичасе.
— Трампгун дандчIвазе гьечIищ гъира?
— Буго. Америкаялъул цолъарал штатазде ине инсуе виза рагьунгутIиялда сверухъ чанго суал кьелаан гьесие.
— Суалазе кьолел чIванкъотIарал жавабазухъ балагьун бихьулеб буго мун гIемер цIалдолев вугеблъи. Школалда цIализе кинав вукIарав?
— Щуйил къиматазда цIаличIо, амма хашал къиматал росун вачIани, инсуца гIадлу гьабулаан. Къо спортивияб залалдаги тIамун, свакан рокъове щвараб заманалдаги тIамулаан гьес дун цIалдезе, хъвадаризе, къватIисел пачалихъазул мацIал лъазаризе. Гьединго рукIунаан болжалги бихьизабун цIалун лъугIизаризе кколел художествиял тIахьалги.
— Биатлон бокьулищ?
— Гьеб буго къохIехьей ва кутакаб хIадурлъи къваригIунеб спорт. Хасго финишалде щолеб заманалда хIажалъула къуватги сабурги. Лыжабазда хъещтIезе, конькабаздаго гIадин, гIемер лъаларо. ГIилла, инсуца сакъат ккезе гурин абун гьезде вахине гьукъулев вукIин. Амма гьанже ругьун гьавулев вуго ва ракIалда буго Дагъистаналда хоккеялъул стадион базе, гьединго рехсараб спорталъул федерацияги гIуцIизе.
Темирхан ХIасанов
