ХIакъикъаталде сверараб маргьа

Россиялъул тIасабищараб команда къуна хорватиялъулаздаса

Футболалъул рахъалъ дунялалъул чемпионаталъулгун къо-мехлъикI гьабуна Россиялъул тIасабищараб командаялъ. Финалалъул ункъил бутIаялда гьеб къуна Хорватиялъул командаялдаса. Амма, кин букIаниги, финалалъул ункъил бутIаялде борчIигицин Россиялъул командаялъе кIудияб бергьенлъилъун ккола.

Нилъераз чеспионаталда гьединаб
хIасил бихьизабилин ракIалдецин кколеб букIинчIо. Гьеб макьу, хIакъикъаталде свериялъулъ аслияб бакI ккола командаялъул тренер Станислав Черчесовас. Баркала буго, жидерго гьунаралдаги божун, тренерасул тIадкъаялги малъа-хъваялги тIуразарун, дунялалъул къуватал футболистаздаса къун хIачIел нилъеразеги. Хорватазул мухъилъ рукIана «Барселонаялъул», «Реал Мадридалъул», «Интералъул», «Ливерпулалъул», ай Европаялъул бищунго къуватал футболалъул клубазда хIалел футболистал. Нилъер командайин абуни гIуцIун букIана гIицIго Россиялъул премьер-лигаялда хIалел спортсменаздаса. Гьедин букIаниги Россиялъул тIасабищараб команда хашго хIалеб букIинчIо хорватаздаса, цо-цо мехалъ майданалда тIокIлъигицин бихьизабулеб букIана. Щибаб маргьадулги букIуна ахир, цоялъул лъикIаб, цогидалъул квешаб. Россиялъул тIасабищараб командаялъе хIакъикъаталде сверараб гьеб маргьаялъул ахир квешаб кканин абизе бегьиларо. Гьеб хIасил, ай дунялалъул чемпионаталъул финалалъул ункъил бутIаялде борчIи, гIунги тIокIаб буго нилъер командаялъе жакъа. Жеги чемпионлъиялъул бицине цудунго буго. ГьечIелъулха Россиялъул командаялда Мбапе, ДеБрюйне, Азар, Лукаку, Гризман, Кейн, Стерлинг ва цогидалги футболистал.
10 июлалда футболалъул рахъалъ дунялалъул чемпионаталъул бащдаб финалалда Франция дандчIвана Бельгиягун. ХIалуцараб хIаялда 1:0 хIисабгун бергьенлъи босана парангаз. 11 июлалда Москваялда «Лужники» стадионалда Англиялъул тIасабищараб команда дандчIвана Хорватиялъул футболисталгун. 2:1 хIасилгун финалалде рорчIана хорватал. 15 июлалда финалияб хIаялда Франция дандчIвазе буго Хорватиягун.