Эркенаб гугари

49-абилеб халкъазда гьоркьосеб турнир

 

Аслияб мурад букIана Дагъистаналъул гугариялъул хасаб школа гIуцIи

Каспийскалда бугеб спортивияб кIалгIаялъуб тIобитIана машгьурав гугарухъан ГIали ГIалиев ракIалдещвеялъул хIурматалда эркенаб гугариялъул рахъалъ 49-абилеб халкъазда гьоркьосеб турнир. Гьелда гIахьаллъана Россиялдаса, Азербайжаналдаса, Латвиялдаса, Беларусалдаса, Словакиялдаса, Монголиялдаса, Украинаялдаса, Гуржиялдаса, Гъиргъизиялдаса, Болгариялдаса, Румыниялдаса ва Узбекистаналдаса 150-ялдаса цIикIкIун гугарухъан.

Совет Союзалъул кIицIул
БахIарчи ракIалдещвеялъе
Къецазда гIахьаллъана 10 команда

Орлов областалъул Мценск шагьаралда тIобитIана Совет Союзалъул кIи­цIул БахIарчи, летчик-испыта­тель Амет-Хан Султан ра­кIалдещвеялъе централияб федерали­яб округалъу­л (ЦФО) субъектазул командабазда гьоркьоб мини-футболалъул рахъалъ Х-абилеб чемпионат.
ЦФОялда вугев ДРялъул дармил вакиллъиялъул пресс-хъулухъалъ информациялъулаб агентствоялда лъазабухъе, къецазда гIахьаллъана 10 команда (300 спортсмен): Ярославль, Орлов, Кострома, Владимир, Тверь, Тула, Иваново, Белгород, Москва областазул ва Москва шагьаралъул командаби.
«2008 соналдаса нахъе ЦФОялъул батIи-батIиял субъектазда тIобитIулеб гьеб турниралъул кIудияб кIвар буго гIицIго футбол машгьур гьабиялъе ва дагъистаниязул бухьенал щула гьария­­лъе гуребги, профилактикиял, тарбиякьеялъулал мурадазеги», — ян баян кьуна ЦФОялда бугеб ДРялъул дармил вакиллъиялъул пресс-хъулухъалъ.
Къецал рагьиялъулъ ва гьел тIоритIиялъулъ гIахьаллъи гьабуна Орлов областалъул нухмалъулез, Орлов областалъул халкъиял депутатазул советалъул депутатаз, Мценск шагьаралъул нухмалъулез, ЦФОялда вугев ДРялъул вакил МухIамад Сайгидовас, студентаз, гIолилазул организациязул вакилзабаз.
Къецазул хIасилалда рекъон, тIо­це­бесеб бакI ккуна Иваново облас­талъул, кIиабилеб – Москваялъул ва лъабабилеб Орлов областалъул командабаз.
ХIадурана ГIабдула Хазамовас.