Красноярскиялда, Иван Ярыгинил хIурматалда, тIобитIана эркенаб гугариялъул рахъалъ иргадулаб турнир. Исана гьелда гIахьаллъана 11 пачалихъалдаса 341 спортсмен. Къуватал гугарухъабаздаса гIуцIарал рукIана СШАялъул, Монголиялъул, Казахстаналъул тIаса рищарал командаби. Гьезул мухъилъ рукIана Олимпиялъул чемпионалгун призерал. Дагъистаналъул тIаса бищараб командаялда гъорлъин абуни исана, аслияб къагIидаялда рукIана гьанжего гьанже гугариялъул Олимп асир гьабизе байбихьарал гIолилал.
Эркенаб гугариялъул рахъалъ Россиялъул тIаса бищараб командаялъул тренеразул штабалъ Ярыгинил Гран-приялдаса эркен гьарун рукIана кIицIул Олимпиялъул чемпион ГIабдулрашид Садулаевгун Олимпиялъул чемпион Завур Угуев.
БатIи-батIиял гIиллабаздалъун Красноярскиялда цере рахъинчIо цо-цо цогидалги нилъер къуватал речIчIухъаби. Амма гьел рукIинчIониги, Дагъистаналъул командаялъ рихьизаруна лъикIал хIасилал. Нилъерал Красноярскиялдаса тIад руссана ункъо меседил, ункъо гIарцул ва микьго мазгарул медалал гун.
Гран-приялда меседил медалазе мустахIикълъана Рамиз ХIамзатов (57 кг), ГIабасхIажи МухIамадов (61 кг), Шамил МухIамадов (65 кг) ва Даурен Куруглиев (86 кг). ГIарцул медалал щвана АхIмад Идрисовасе (57 кг), Рамазан Ферзалиевасе (65 кг), Аманула Расуловасе (86 кг) ва Шамил Мусаевасе (97 кг). Мазгарул медалазда гIей гьабуна Муса Мехтихановас (57 кг), ГIабдурахIман Расу ловас (61 кг), Ибрагьим Ибрагьимо вас (65 кг), Къурбан Шираевас (70 кг), МухIамадрасул ГъазимухIамадовас (74 кг), ХIажи Набиевас (79 кг), Ада БахIамадовас (86 кг) ва Тажудин Мухтаровас (92 кг).
Гъоркьиса Дагъистаналъул командаялъе Красноярскиялда щун букIана анлъго меседил, лъабго гIарцул ва щуго мазгарул медалал.
Иван Ярыгинил Гранприялда Россиялъул тIаса бищараб командаялъул спортсменаз (бихьиназ ва руччабаз) 13 меседил, 14 гIарцул ва 23 мазгарул медалалгун ккуна тIоцебесеб бакI. КIиабилеб бакI щва на СШАялъул командаялъе (лъабго меседил, лъабго гIарцул ва цо мазга рул медалал). Лъабабилелда гIей гьабуна монголаз (кIиго меседил, кIиго гIарцул ва 10 мазгарул).
Гьеб турниралда руччабазда гьоркьоб лъабабилеб бакI ккуна 50 кг цIайиялда цее яхъуней дагъистанияй Милана Дадашевалъ. Финалалъул бащдаб бутIаялда гьей къезаюна турниралъул чемпионкалъун яхъарай Надежда Соколовалъ. Турнир лъугIун хадуб чемпион Кайл Снайдерилгун гарачIвари гьабулелъул, журналистас гьесда гьикъана Россиялъул кинаб регион гьесие бищунго рекIее гIурабилан. Америкаялъуласги жаваб гьабуна Дагъистан, МахIачхъала, ЧIарада районилан. Жив магIарулав вугинги тIаде жубана Снайдерица.
Россиялъул эркенаб гугариялъул рахъалъ тIаса бищараб командаялъул тренер Дзамболат Тадеевасул рагIабазда рекъон, Иван Ярыгинил хIурматалда Красноярскиялда тIобитIулеб Гран-при ккола спортсменазе гугариялъул дунялалде лъураб кьолъун. «Гьелда борцуна спортсменазул къуват, загьирлъула бажари-гьунар. Исана нижеца гIолохъанал спортсменазе нухги рагьун турниралдаса эркен гьаруна Олимпиялъул чемпионал ва гьединго цо-цо цогидал спортсменал. Амма унтун рукIиналда бан гьенир гIахьаллъизе рес ккечIелги ккана. Кин букIаниги, къецал ана тIадегIанаб даражаялда. Абизе бегьула спортсменаз тренеразул штабалъул жидеде букIараб божилъи ритIухъ гьабунилан. Дун рази вуго щивасдаса. Жакъа Ярыгинил турниралда бергьенлъи босарал спортсменал, гьел ккола нилъер улкаялъул гугариялъул букIинесеб. КватIичIого Болгариялда букIине буго гугариялъул турнир. Гьелда ккарал хIасилалги хIисабалде росун, гIуцIизе буго Будапешталда тIобитIизе кколеб Европаялъул чемпионаталде рачине ругел спортсменазул сияхI. Гьебги загьир гьабизе буго Сочиялда рукIине ругел сбораздаса хадуб»-, ан абуна Д. Тадеевас.
Дагъистаналъул гугариялъул федерациялъул президент ХIайдар ХIайдаровас бицана Ярыгинил Граприялда цеве республикаялъул командаялъул чанго спортсмен унтун вукIанин, гьелда бан чангояв къецазда гIахьаллъичIилан.
«Гьединаб ахIвал-хIал букIаниги, цереги рахъун лъикIал хIасилал рихьизарурал спортсменазеги гьезулъ божилъи бижизабурал тренеразеги буго кIудияб баркала. Баркала загьир гьабизе бокьун буго нижгун кидаго рукIунел командаялъул рахъкколезе ва гьединго гьаб захIматаб заманалда тIаса бищараб командаялъе лъикIал шартIал чIезарурал, кумекалъе хIалае чIарал Спорталъул министерствоялъегун Дагъистаналъул нухмалъулев Сергей Меликовасе. Гьанже, Аллагьас хъван батани, апрелалда Будапешталда букIине бугеб Европаялъул чемпионаталде хIадурлъизе ккола»-, ян абуна ХI. ХIайдаровас.
Темирхан ХIАСАНОВ
