ХIалтIулаб сапаргун Орел областалде щвана ДРялъул Физкультураялъулгун спорталъул ва Миллияб политикаялъулгун диниял ишазул министерствабазул вакилзаби. Гьел дандчIвана рехсараб регионалда гIумру гьабун ругел ракьцоялгун, Мценск шагьаралъул мэр Сергей Волковгун ва щвана спортивиял школаздеги.

 

    Дагъистаналъул делегациялда гъорлъ рукIана Спорталъул министерствоялъул управлениялъул нухмалъулев Халитбег МахIачев, Орел областалда вугев Дагъистаналъул хIукуматалъул вакил ГIисабег МухIамадов, «ВатIан Дагъистан» гIуцIиялъул председатель ХIабиб МухIамадов ва цогидал. «Нижер мурад букIана Орел областалда гIумру гьабун ругел ракьцоязул ахIвал-хIалалъухъ бакIалде щун балагьи, гIолел-гIоларел рахъазул хIакъалъулъ цIех-рех гьабун гьезие бажарараб кумек гьаби. Гьезул иш квеш батичIо. ГIезегIан лъикIаб магIишат буго нилъеразул Орел областалда. Баркала буго гьезие ниж лъикIаб даражаялда къабул гьаруралъухъ», — ан бицана Х. МахIачевас. Министерствабазул вакилзаби щвана Дагъистаналдаса тренерал хIалтIулел спортивиял школаздеги. Мисалалъе, Мценскалъул Олимпиялъул нахъраталил кIиабилеб спортивияб школалда дзюдоялъул тре- нерлъун хIалтIулев ХIажирамазан ХIажирамазановас ахIун рукIана гьел жинхъего. «ХIажирамазаница хIалтIи гIуцIун буго лъикIаб къагIидаялда, хIасилалги квешал гьечIо. Мценскалъул нухмалъиялъ ва школалъул дирекциялъ гьесул къиматги гьа- булеб буго.

   ГIисинал спортсменазе насихIатал, малъа-хъваял гьаруна нижеца», — ян бицана министерствоялъул управлениялъул нухмалъулес. Халитбег МахIачевасул рагIабазда рекъон, кватIичIого ДРялъул Миллияб политикаялъул ва ди- ниял ишазул министерствоялъул хIаракаталдалъун Кривцово поселокалда рагьизе буго Орел область фашистаздаса цIунун къеркьарал дагъистаниязул хIурматалда памятник. Гьеб букIине буго гьениб бугеб ракIалде щвеялъул мемориалалда.