«Анжи» — 24 очкогун 14-абилеб бакIалда
Премьер-лигаялда футболалъул рахъалъ Россиялъул чемпионаталъул 24-абилеб туралда МахIачхъалаялъул «Анжи» Краснодаралда хIана «Краснодар» командагун.
Гьел командабазда гьоркьоб 2017 соналъул сентябралда Каспийскалда тIобитIараб Россиялъул чемпионаталъул тIоцебесеб горсвериялъул матч лъугIун букIана 5:1 хIисабгун «Краснодаралъул» бергьенлъиялдалъун. Гьединлъидал турниралъул таблицаялъул ахирисел бакIазда букIаниги, Дагъистаналъул болельщиказул хьул букIана Краснодаралда букIараб матчалда «Анжиялъ» «рецIел босилин» ва бергьинин. Амма «Краснодаралъул» кавабахъе хIаялъул ахирисеб минуталда «Анжиялъ» кьабураб торгIоги «рецIел босилъун» рикIкIине бегьула.
Командабаз цоцазул кавабахъе кьабуна цо-цо торгIо ва хIай лъугIана 1:1 хIисабгун.
Дагъистаналъул команда жеги къеркьолеб буго премьер-лигаялда хутIиялъе гIоло. Гьеб туралдаса хадуб «Анжи» 24 очкогун турниралъулаб таблицаялъул 14-абилеб бакIалда буго.
Микьабилеб апрелалда 25-абилеб туралда «Анжи» хIазе буго Анжи-Аренаялда Москваялъул «Спартак» командагун. «Спартак» къеркьолеб буго чемпионлъун бахъиналъе гIоло. Гьединлъидал «Анжиялъе» гьеб матч букIине буго цIакъго хIалуцараб.
Россиялъул командаялъе – Африкаялъул кубок
28 марталда Мароккоялда лъугIана паратхэквондистазда гьоркьоб Африкаялъул чемпионат. Россиялъул тIасабищараб командаялда гъорлъ церерахъарал Дагъистаналдаса паратхэквондистазе гьениб щвана цо гIарцул ва кIиго мазгарул медалал.
58 килограмм цIайиялда гIарцул медаль щвана Марям Салимгереевалъе, мазгарул медалазе мустахIикълъана МухIамадзагьир ГIисалдибиров (75 кг) ва Зайнудин Атаев (75 килограммалдаса цIикIкIараб цIайи).
Тренер МухIамад ГIабдулаевас нухмалъи гьабулеб паратхэквондоялъул рахъалъ тIасабищараб Россиялъул командаялъе гьеб чемпионаталда щвана кIиго меседил, кIиго гIарцул, щуго мазгарул медалал. Гьеб хIасилалда рекъон Россиялъул тIасабищараб командаялъе чемпионаталда щвана тIоцебесеб бакI ва Африкаялъул хIурматияб кубок.
Политика сабаблъун
Россиялъул гугарухъабазе изну щвечIо Америкаялде ине
