ХIабиб НурмухIамадов дандчIвазе вуго Тони Фергюсонгун
РикIкIарал къоял хутIана Америкаялъул UFC гIуцIиялъул рачелалъе гIоло ХIабиб НурмухIамадовасдаги Тони Фергюсонидаги гьоркьоб къеркьей тIобитIизе. Гьебин абуни букIине буго Нью-Йоркалда 8 апрелалда. Гьел спортсменал тIоцебесеб нухалъ гуро цоцалъ къеркьезе октагоналде рахъине кколел рукIарал. ХIабибгун Тони дандчIвазе кколаан 2016 соналъго. Амма доб мехалъ, Америкаялъул Цолъарал Штатаздаса спортсменасе сакъат ккун, къеркьей тIобитIичIо. UFCялъ 2017 соналъги лъазабун букIана гьезда гьоркьоб къеркьей букIине бугин, амма гьеб нухалъ сакъатлъи ккана дагъистаниясе.
ХIабиб НурмухIамадов ккола къей лъаларев спортсмен. Рингалде гьев вахъана 25 нухалъ ва киналго къеркьеязда дандиязда тIад ракIчIараб бергьенлъиги босана. Гьединал спортсменал къанагIат гурого гьечIо дунялалдаго къуватаблъун рикIкIунеб UFCялъул лигаялдацин. Дунялалда гьесул цIар машгьурлъана ахирисеб къеркьеялдаса хадуб, ай Бразилиялдаса речIчIухъан Эдсон Барбозадаса бергьиндал. Америкаялъул UFC гIуцIиялъул турниразда ХIабиб цеве вахъунев вуго 2012 соналдаса нахъе. ХIисаб гьабуни, гьоркьохъеб къагIидаялда лъагIалида жаниб цо турниралда гурого гIахьаллъулев гьечIо дагъистанияв. Профессионалияв речIчIухъанасе гьеб дагь буго, ва спортивиял экспертазги гьеб хIужа рикIкIунеб буго НурмухIамадовасул бищунго кIудияб гIунгутIилъун.
ТIадагьаб цIайиялда
UFCялъул чемпион
Америкаялъул Цолъарал Штатаздаса спортсмен Тони Фергюсон рингалде вахъана 26 нухалда ва лъабго къеркьеялда къуна. UFCялъул турниразда цо нухалъ гурого мукIурлъичIо гьев дандиясе. Тони Фергюсон UFC лигаялъул чемпионлъун вахъана, Кевин Лидадасаги бергьун. Абизе ккола, Кевинидаса Тони бергьанин хIалихъе, судиязул хIукмуялдалъун.
ХIабибил ва Фергюсонил
къуватал рахъал
ХIабиб вуго гIадатияв гугарухъан. Амма ахирисеб къеркьеялда гьес бихьизабуна эхетун вагъизеги бажарулеблъи. Эдсон Барбозадаса къолев вукIинчIо дагъистанияв гьеб рахъалъ. Фергюсонил къуватал рахъаллъун ккола тирун мал хьвагIи ва гIункIрукь кьаби. Гьединго гугаризеги нахъе кколаро гьев. Гьесие бищунго бокьулеб къагIидалъун ккола дандияв гъанкъи. Тонил загIипаб рахълъун рикIкIине бегьула, къеркьолаго, гьев хехго свакалев вукIин. ХIабибида гьеб рахъалъ гIайибчIвазе бакI гьечIо. Гьелъие мисаллъунги ккола Барбозагун букIараб къеркьей. Щуябго раундалда, тIаса вичIичIого, чухIана дагъистанияс американав.
Щив бергьине бегьулев?
Жубараб речIчIухъанлъиялъул рахъалъ гIемерисел экспертазул пикруялда рекъон, ХIабибидагун Тонида гьоркьоб къеркьей халатбахъине бегьула регламенталда бихьизабураб щуябго раундалъ. Гьез рикIкIунеб буго Тони ХIабибида бигьаго къуркьизавизе кIвезе гьечIин. «Фергюсоница хIаракат бахъизе буго ХIабибгун эхетун вагъизе. Щай абуни, гьесул гугари дагъистаниясдаса гIемерго нахъеккараб бугелъул. Гьелде тIадеги, американасда кIвезе гьечIо ХIабибие гъанкъулеб къагIида гьабизеги. Дагъистаниясе гьединаб къагIида жеги лъицаго гьабичIо, гьесги гьабизе хIалгицин бихьизе биччаларо. Амма НурмухIамадовас, щиб санагIат батунги, Тони гугариялде цIазе вуго. Нилъеда бихьанаха гьес UFCялда бищунго тейкдауназдаса цIунизе гьунар бугевлъун рикIкIунев Барбозае щиб гьабурабали». Гьедин рикIкIунеб буго жубараб речIчIухъанлъиялъул рахъалъ эксперт Джордж Норисица.
ХIабиб НурмухIамадовасул менеджер ГIали ГIабдулгIазизица бицана дагъистанияв букIинесеб къеркьеялде 90 проценталъ хIадур вугин. «ХутIараб жо буго гIицIго чанго килограмм тIаса рехизе. Гьеб рахъалъги гьаб нухалъ кинабго лъикI, планалда рекъон унеб буго. ХIабиб ккола букIине бугеб къеркьеялъул аслияв багьадур. UFC гIуцIиялъ дагъистаниясе гьеб речIчIиялъухъ кьезе буго Тони Фергюсонидаса ункъо нухалъ цIикIкIун гонорар. Гьелъги бицуна ХIабиб вукIин рехсараб гIуцIиялъул бищунго машгьурал речIчIухъабазул цояв. Дагъистанияв гIахьаллъарал турнирал дунялалъулго телекомпанияз росула», — ян тIаде жубана ГIали ГIабдулгIазизица.
ХIабиб НурмухIамадовасдагун Тони Фергюсонида гьоркьоб букIине бугеб къеркьей бихьизабизе буго МахIачхъалаялъул кIиго кинотеатралда — «Россиялдаги» «Октябралдаги».
