ТIад руссана 18 медальгун

 

    Улан-Удэялда букIараб эркенаб гугариялъул рахъалъ Россиялъул чемпионаталдаса Дагъистаналъул тIаса бищараб команда тIад буссана щуго меседил, гьедигIанго гIарцул ва ичIго мазгарул медальгун.

 

    Чемпионаллъун рахъана: Завур Угуев (57 кг), ГIабасхIажи МухIамадов (61 кг), ХIажимурад Рашидов (65 кг), МухIамад Къурбанов (92 кг) ва ГIалихан ЖабрагIилов (97 кг). ГIарцул медалазе мустахIикълъана: Муслим Мехтиханов (61 кг), Загир Шахиев (65 кг), Разамбек Жамалов (74 кг), АхIмад ГIусманов (79 кг), Даурен Куруглиев (86 кг).

    Мазгарул медалазда гIей гьабуна Абубакар Муталиевас (57 кг), Къурбан Шираевас (65 кг), ГIабдулмажид КIудиевас (65 кг), ГIабдул АхIмадовас (70 кг), МухIамад КъурбангIалиевас (74 кг), МухIамадрасул ГъазимухIамадовас (74 кг), ХIажи Набиевас (79 кг), МухIамад Рамазановас (86 кг) ва АхIмад ХIажимухIамадовас (86 кг).

    ПалхIасил, Россиялъул чемпионаталда Дагъистаналъул командаялъ ккуна тIоцебесеб бакI.

    Гъоркьиса Наро-Фоминскалда букIараб улкаялъул чемпионаталда анцIго батIияб цIайиялъул категориялда гьоркьоса нилъер гугарухъабазе щун букIана меседил микьго медаль.

   Гьединал хIасилал дагъистанияз Россиялъул чемпионаталда цереккун рихьизарун рукIинчIо. Амма Олимпиялъул хIаязда цересел къецазде цогидал командабиги кIвар кьун хIадурлъизе ругеблъи бичIчIулеб букIана ва гьедин ккезеги ккана. Гьаб нухалъ цогидал регионаздаса гугарухъабаз Дагъистаналдаса атлетазда лъикIаб дандечIей гьабуна.

    Гьедин, 57 кг цIайиялъул финалияб къеркьеялда Тываялдаса гугарухъан Начын Монгушица кIвараб яхI бахъана Завур Угуевасда данде гугарулаго. 4:0 хIисабгун къолев вукIарав гьес ункъо баллалъул прием гьабуна дагъистаниясе ва хIасил бащад гьабуна. ГIезегIан захIмат бихьана нилъерасда гьев къезави- зе, амма ахир-къадги щуго балла­ лъул приемги гьабун, 9:4 хIисабгун дандчIваялда бергьенлъи босана Завурица.

    86 кг цIайиялдаги финал букIана хIалуцараб. Гьеб категориялда дагъистанияв Даурен Куруглиев гугарана Артур Найфоновгун. Финалалъул бащдаб бутIаялъул къеркьеялда, хIалихъего цоги ни­ лъер ракьцояв МухIамад Рамазановги къезавун, ворчIана Осетиялдаса спортсмен финалалде. 8:1 хIисабгун къолев вукIарав гьесухъа бажарана тIатIала ичIго балл босун. Даурен Куруглиевасдаги ракIалда букIинчIо дандиясе бигьаго бергьенлъи кьезе. ТIоцебе баллги босун, парахатго гугарулев вукIарав гьев ургуялъул гIорхъабаздаса къватIиве тункана асатIинас. Къеркьей лъугIизегIан хутIана гьел тарихал таблоялда. Ахирисеб прием гьабурасе кьоле­ лъул бергьенлъи, судияс квер борха- на Найфоновасул.

    Россиялъул чемпионаталда же­ги кIиго меседил медаль щвелаан нилъер командаялъе гьелда ГIабдулрашид Садулаевгун Шамил Шарипов цере рахъун рукIаралани. ГIабдулрашид тренераз чемпионталдаса эркен гьавун вукIана. 92 кг цIайиялда, цогидазул хIасилазухъ балагьичIого, гьев Олимпиялъул хIаязда гIахьаллъизе вукIин хIакъаб бугелъулха. Шамил Шарипов 18-21 марталда гIахьаллъизе вуго Будапешталда букIине бугеб Олимпиялъул хIаязде ине рес кьолеб лицензиялъулаб турниралда.

    — Чемпионат ана лъикIаб даражаялда. Гьелда бергьана гьаб Олимпиялъул циклалда бищунго хIаракатчилъи бихьизабурал ва цIикIкIун бергьенлъаби росарал спортсменал. Гьел киналго Европаялъул чемпионаталде ине ругищали жеги лъаларо, моцI буго цебе, балагьила, ургъила. Гьанже аслияблъун ккола Олимпиялъул хIаязде бакIаб цIайиялда лицензия щвей, — ан бицана эркенаб гугариялъул рахъалъ Россиялъул тIаса бищараб командаялъул бетIерав тренер Дзамболат Тедеевас.

   Темирхан ХIАСАНОВ