ГIалимчиясул хIурматалда

 

Къудукьа Мусалав — гIелмудул ралъад,

ГIалам хIайранлъана дур хIикматазда…

    Гьал къоязда Хьаргаби районалъул Къудукь росулъ тIобитIана, цебегоялдаса гIадатлъун билълъараб росдал садакъадул къо.

    Щибаб соналда августалъул лъабабилеб рузманкъоялъ тIобитIула росдаего садакъа бикьулеб тадбир. Гьанал садакъадулъ гIахьаллъизе бокьараз хъураб чIегIерхIайван 10 – ялдеги бахуна, цо-цо cоналда гьелдаса цIикIкIунги букIуна. Росдал щибаб цIараки рикIкIун гьарула гьанал бутIаби. Гьеб къоялде росулъе рачIуна шагьараздаса росуцоялги. Садакъа гьабизе рес бугевщинав чияс бикьула чед, пиринчI, цIам, макарон, чакар, пластмассалъул цIарагIал ва цогидал кванил нигIматалги. Бикьулеб босизе росуцоялги рачIуна.

     КIудияв гIалимчи — «Мусалав аль-Къудукъи» абун халкъалда гьоркьоб жиндир цIар тIибитIарав, гIарабист ракIалде щвезавиялъул мажлисалъе кьучI лъун буго 1992 соналда. Гьев мубарак кIодо гьавун садакъадул къоялда хадуб, ай шамат къоялъ, росдал мажгиталда тIобитIула кIудияб мажлис «Мусаласул къо» абун билълъун буго гьеб къоялда цIарги. РачIуна сверухъ росабалъа ва тIолго Дагъистаналъул цо-цо росабалъа имамзаби, гIалимзаби ва гьединго мажлисалда гIахьаллъи гьабизе бокьарал цогидалги. Гьарула вагIзаби, цIалула назмаби, бицуна Мусаласул гIумруялъул, тарихалда ва гIелмуялда гьес тарал лъалкIазул, гьесул хIикмалъабазул хIакъалъулъ. ТIаде рачIаразда рихьизарула Мусаласул нахъе цIунун хутIарал тIагIел-алатал, гьесул квералъ хъварал тIахьал. Гьеб кинабго цIунун буго росдал мажгиталда. Ахираб кIиго соналъ пандемиялъ рес кьечIо росуцоязе гьеб берцинаб мажлис гIуцIизе.

     Гьел ва цогидалги росдал тадбиразе квербакъи гьабулев росдал дибир, росуцоязул мугъчIвалев хIуби — МухIамад Такъигудиновасеги гьединго росдал администрациялъул бетIер ГIали МухIамадибировасеги кIудияб баркала кьола росуцоязги тIаде рачIаразги. ИншаАллагь хьул буго бачIунеб соналда, пандемиялъул балагьги тIаса ун, рес ккелин цебе букIахъе, гIадатлъун билълъараб куцалда, садакъадул къоялдаса хадуб, берцинго гьалбалги къабул гьа- рун, исламияб мажлисги тIобитIизе. Жиндир баракатги шапагIатги нилъее щваяв «ГIелмудул ралъадги» ва «ГIалимзабазул къутIбуги» вукIана дунял-гIаламго жинда хIайранав Къудукьа Мусалав. «Мусаласул къо» ккола росуцоял цолъиялъеги ва цогидал цадахъал ишазе квербакъиялъеги кьучIлъун.

 ГI. АСАДУЛАЕВА