ЛъикIаб къимат кьуна

Дагъистаналда сахлъицIуниялъе гIуцIун ругел шартIаздаса рази хутIана О. Аполихин

 

6-7 марталда Дагъистаналде вачIун вукIана Россиялъул сахлъицIуниялъул министерствоялъул репродуктивияб сахлъиялъул рахъалъ штаталда гьечIев бетIерав специалист Олег Аполихин. ТIоцебесеб иргаялда, гьев щвана республикаялъул урологияб централде. Гара-чIвари гьабуна унтаразулгун. Централъул тохтурзабазулгун букIараб дандчIваялда гьес бицана «Цогояб профилактикияб ахIва-хIал» абураб программаялъул хIакъалъулъ. Гьелда рекъон, унтаразе медицинаялъулаб кумек щвезе ккола чIобого.
— Больницабазде щведалги унтаразухъ гIенеккидалги, дида бичIчIана Дагъистаналда унтаразе гьабулеб медицинаялъулаб хъулухъ лъикIаб даражаялда букIин, — ан абуна гьес.
КватIичого Дагъистаналъул урологияб центр лъугьине буго Россиялъул сахлъицIуниялъул урологиялъул НИИялъул филиаллъун. Гьеб институталда централъул тохтурзабаз жидерго махщелги камил гьабула.
Хадуб Олег Аполохин ана Буйнакскалде. Дагъистаналъул сахлъицIуниялъул министрасул ишал тIуралев Танка Ибрагьимовгун цадахъ щвана шагьаралъул больницаялде, гара-чIварана унтаралгун, дандчIвана тохтурзабигун.
Гьес лъикIаб къимат кьуна республикаялда «Бихьиназул сахлъи ва социалияб гIумру халалъи» абураб проект гIумруялде бахъинабиялъе гьабулеб бугеб хIалтIуе.