Дагъистаналъул бетIер гIолилалгун дандчIвана
Талат къоялда Пятигорскалда байбихьана Северияб Кавказалъул гIолилазул форум «Машук- 2019». Гьениб гIахьаллъулеб буго Дагъистаналдаса гIолилазул къокъаги. Гьел дандчIвазе руго СКФОялъул субъектазул нухмалъулелгун.
Тадбиралда гIахьаллъана Дагъистаналъул бетIер Владимир Васильевги. Гьев дандчIвана Дагъистаналдаса гIолилалгун, бицана лъайкьеялъулги, сахлъицIуниялъулги, культураялъулги, батIи-батIиял проектазулги хIакъалъулъ.
Гьениб гIолилаз бицине буго жидерго проектазулги, гьел гIумруялде рахъинариялъе гьаризе ругел хIалтIабазулги хIакъалъулъ. АнцIабилеб нухалда тIобитIулеб бугеб форумалда гIахьаллъулев вуго 2,5 азарго чи. Къецалги тIоритIизе руго батIи-батIиял номинациязда. Дагъистаналдаса форумалъул лъабабго сменаялда гIахьаллъулев вуго 500 чи. Гъоркьиса тIобитIараб форумалда щварал грантазул къадаралъул рахъалъ дагъистанияз ккун букIана тIоцебесеб бакI — гIаммаб къадар – 1,8 млн гъурущ. Исанаги гьарула гьезие чIахIиял бергьенлъаби.
