Релъулел лъимал руго, гьимулеб талихI буго

 

РоцIараб дунялги. ХъахIилаб зобги. Лъималазул релъиги. Гьезул разиял гьурмазда баулел бакъул чIоралги, чIораздаги рекIун, гьезул гIумру берцинлъиялъе доба-гьаниб роржанхъулеб анкькьераб нурги.

ГIадамал! ХIинкъизабуге гьеб недегьаб талихI. Бахъуге лъималазухъа гьелъул рагIдукь батулеб гьогьоми.
Лъималазул талихIалъул кIул буго нилъехъ. РичIе гьелъ каваби – биччанте гьел роржине цIияб дунялалде жидерго талихIалде данде.
ЧIваге гьезул гьими, гьуинаб гIумру. РечIчIуге чIинхал жеги малърал къвакIичIел загIипал хIанчIазул рорженалда. Лъимал чиярал рукIунаро. ГIинтIаме цогидаб дунялалда ругел унтарал-щокъал, сакъатал лъималазул рекIел хIалалъухъги. Гьезул хIалуциналъе хIайранго кье жаваб.
Цинги дунялго цIела лъимерлъиялъул талихIал сариназ.
Роол тIоцебесеб моцIалъул тIоцебесеб къоялда тIолабго дунялалда кIодо гьабула Халкъазда гьоркьосеб лъимал цIуниялъул къо. Гьеб тIобитIулеб буго 1950 соналдаса байбихьун. Гьеб къоялда, тIоцебесеб иргаялда, чIахIиязда цоги нухалда ракIалдещвезарула лъималазулги ихтиярал рукIин.
Россиялда гIумру гьабулеб буго 26 миллионалдасаги цIикIкIун лъимералъ. Соналдаса соналде цIикIкIунел руго эбел-инсуца рехун таразул, бесдалазул къадар.
Жакъа къоялде нилъер улкаялда гьезул къадар бахун буго 714 азаргоялде. 136 азарго лъимералъ гIумру гьабун буго лъималазул рукъзабахъ ва интернатазда.
Улкаялъул пенсиялъул фондалъул баяназда рекъон, Россиялда буго 655014 сакъатаб ва жеги 18 сон бачIеб лъимер. Гьезда гьоркьоса «лъимер-инвалид» абураб категория тасдикъ гьабуна 249036 лъимералъул.
Дагъистаналда вуго 46248 сакъатаб лъимер.