Ленинкенталда — теплица

«Агромир» комплекс рагьиялъул тадбиралда бицана гIезаризе ругел нигIматазул

 

Ленинкенталда теплицабазул комплекс рагьиялъул тадбиралда гIахьаллъарав ДРялъул бетIер Владимир Васильевас бицана нигIматал цIуни, къачIай, гьеб цIунулеб къвачIа гьаби кколин цIакъ кIвар бугеб хIалтIиян. Ва росдал магIишаталъул хIалтIухъабазе гьарана лъикIаб бачIин.
«Агромир» ОООялъул директорзабазул советалъул вакил Тарлан Абукаровас бицана теплицаялъул комплекс бан бугин ичIго гектаралда. «Европея» компаниязул къокъаялъ 700 миллион гъуруш инвестициязул биччана теплицаялъул комплекс базе. Жакъа гьаниб чIезабун буго хIажатабщинаб, хIалтIизабулеб буго гIицIго нилъерго улкаялда гьабураб алат-къайи. Гьанир хIалтIизарулел руго нигIматал хехго кIудиял гIезариялъул технологиял, гьебго заманалда нигIмат буго экологияб рахъалъ бацIцIадабги», — ян бицана Абукаровас.
Гьезда ракIалда буго шитил (рассада) гIезабизеги. Гьединго кIиго соналда жаниб цо гIаммаб теплицаялъул комплекс базе кIиго миллиард гъуруш биччазе ракIалдаги буго. Цинги комплекс лъугьина Северияб Кавказалдаго бищун кIуди-яблъун. Гьелъул хIасилалда, 10 гаялда гIезаризе руго овощал, цо гаялда – шитил.
Теплицаялда гIезабизе буго 300 000 тонна нигIматазул. Гьеб проект гIумруялде бахъинабиялъул хIасилалда 150 чиясе щвезе буго хIалтIизе бакIал ва мухь. Предприятиялъ кьезе буго лъагIалида жаниб бюджеталде 25 млн гъуруш, гьелдаго гьоркьоса 11 млн — регионалияб бюджеталде. Теплицаялъул хIалтIухъабазул гьоркьохъеб харжги букIине буго 25000 гъуруш.