ДРялъул Журналистазул союзалъ кIодо гьабуна Печаталъул къо
РакIрагьараб накъит
ДРялъул бетIер дандчIвана республикаялъул СМИязул журналисталгун
— Республикаяъул ункъо газеталъ нахъа тана гIасруялъул нух. Россиялда 100 сон тIубарал газетазул юбилеял тIоритIана кIудияб къадруялда. Нилъер республикаялда абуни гьеб тарихияб лъугьа-бахъин, гIарац гьечIин багьанаги батун, тIаса бихьизабуна. Жеги кватIун гьечIо нахъеги гьеб суалалде тIадруссине. Миллиял газетазул дагьал гьечIо кIвар кьезе ккарал суалал. Гьел киналго руго республикаялъул ва газетазул нухмалъулелги данделъун тIуразе кIолел. Бокьилаан гьеб киналъулго бицун гара-чIвари гьабизе рес батани.
В.Васильев:
— Дун хIадур вуго нужее кумек гьабизе ва гьел суалазул бицун мунгун дандчIвазе.
Гьелда гIахьаллъана «ХIакъикъат» газеталъул бетIерав редактор, Дагъистаналъул Журналистазул союзалъул председатель ГIали Камалов, республикаялъул хIукуматалъул председателасул тIоцевесев заместитель Анатолий Карибов, Дагъистаналъул бетIерасул ва хIукуматалъул администрациялъул информациялъул управлениялъул нухмалъулев Зубайру Зубайруев, ДРялъул информатизациялъул, бухьеналъул ва коммуникациязул министр Сергей Снегирев, Россиялъул почалъул управлениялъул Дагъистаналда бугеб филиалалъул нухмалъулев МахIач МухIамадов, газетазул редакторзаби ва ветеранал.
Данделъи рагьулаго, ГIали Камаловас абуна: «Дагъистаналъул журналистикаялда руго гIемерал гIунгутIаби, гьезул нилъеца жакъа бицинаро. Гьезул гIемерисел руго регионалъул нухмалъиялда рухьарал, цадахъ рекъон хIалтIани, тIагIинарун бажарулел. Гьал къоязда букIана ДРялъул бетIерасулги республикаялъул печаталъул вакилзабазулги дандчIвай. Гьенире цо-цоял ахIун рукIинчIо. Хадубккун ракIалде ккола нилъеца гIолелги гIоларелги рахъазулги цогидалъулги цадахъ гIодорги чIун бицине батилин. Нилъер адаб гьабуларебани, гьанире хIукуматалъул вакилзабиги рачIине рукIинчIо. РачIа цадахъ хIалтIизе», — ян.
КIалъазе вахъарав Анатолий Карибовас абуна: «ГIали Камалов ккола цевегоялдаса журналистикаялда гъорлъ вугев, хIалбихьи бугев, гьеб рахъалъул гIадамазда гьоркьов Россиялдаго хIурмат гьабулев, жиндирго пикруялъе хилиплъуларев инсан. Гьединлъидал гьес бицаралъухъ нижецаги гIинтIамула. Кинабго рагIа-ракьанде щвезабун бажаруларо, амма ругел гIунгутIаби нилъеца тIагIинарила. Баркула киназдаго профессионалияб байрам», — ян.
ДРялъул информатизациялъул, бухьеналъул ва коммуникациязул министр Сергей Снегиревасги баркана журналистазда байрам: «РФялъул Журналистазул союзалъул председатель Владимир Соловьевасги баркулеб буго Дагъистаналъул журналистазда байрам. ГIицIго нилъер регионалде битIун бачIун буго гьес баркиялъул телги. Гьес лъикIаб къимат кьолеб буго нужер махщалиеги. Аслияб жо буго, республикаялъул бетIерас, киназдаго рагIизабун, хIукму гьабуна киналго – пачалихъиялги жалго бетIергьаналги – басмабазул подписка гьабизе. РакIбохизабула, печаталъул СМИязул къадру ва гьез жамгIияталда мустахIикъаб бакI кколеб букIиналъги. Гьелде тIадеги, регионалъул бетIерасул руго журналалги газеталги церетIезариялъул хIакъалъулъ хасал пикраби», — ян абуна гьес.
«Интернеталъул заманалда цIикIкIунеб буго печаталъул гурел, электрониял сурсатазул гьурмазде ралагьулел гIадамазул къадар. Абиларо, гьениб ритIухълъиги букIунин, мацIалъул бацIцIалъиги цIунулин абун, амма киназдаго лъала, гIолеб гIелалъе гьез кIудияб асар гьабулеблъи. Хехал тадбирал гьарун нижехъа бажарулеб батичIониги, нилъеца хIаракат бахъизе ккола, Интернеталъул сурсатазулгун къец гьабун бажарулеб хIалалда рукIине», — ян абуна Зубайру Зубайруевас.