Нухазда — низам цIуни
2018-2030 соназда нухазда хIинкъи гьечIолъи чIезабиялъул хIакъалъулъ ицунеб данделъи тIобитIана МахIачхъалаялда
Гьелда гIахьаллъи гьабуна РФялъул МВДялъул ГУОБДДялъул начальник Михаил Черниковас, «ХIинкъи гьечIого нухдасан хьвади» абураб эксперталъулаб централъул президент Наталья Агреца, ДРялъул МВДялъул УГИБДДялъул цIияв тарав начальник Александр Шалагиница, ДРялъул хIукуматалъул председателасул заместитель Рамазан Жапаровас, СахлъицIуниялъул, Лъайкьеялъул ва гIелмуялъул, Транспорталъул министерствабазул вакилзабаз.
Рехсараб программаялъул мурадги ккола нухазда кколел балагьал лъугьа-бахъинал дагь гьари. Масала, исана Дагъистаналъул нухазда ккана 1424 ДТП, ва гьезул хIасилалда хвана 311, лъукъана 2108 чи.
Нилъер улкаялъул нухазул халалъи ккола кIиго миллион километр. Улкаялдаго ДТПязул хIасилалда 100000 чиясда гьоркьоса 13 чи холев вуго. Европаялдайин абуни 100000 чиясда гьоркьоса 4 чи холев вуго. Гьединлъидал, нухазда холезул къадар 3,5 нухалъ дагь гьабиялъул мурадалда, хIадурун буго миллияб проектги.
«Нужер республикаялда руго чIахIиязул адаб-хIурмат гьабулел, цоцазда гурхIел цIикIкIарал гIадамал. Гьаниреги рачIун, нужеда хьвада-чIвадизе малъулел чагIиги ниж гуро. Нижер мурад буго нухазда хIинкъи гьечIолъиялъул тIалабазде нуж ва цогидалги ругьун гьари, цоцазе нух кьеялъулъги, авариялде ккаразе тохтур тIаде щвезегIан битIараб кумек гьабизе ругьун гьариги», — ян бицана Наталья Агреца.
ДРялъул МВДялъул УГИБДДялъул начальник Александр Шалагин хIалтIулев вукIана Астрахань областалда УГИБДДялъул начальникасул заместительлъун. Гьес бицана исана республикаялда нухазда ккарал низам хвезабиялъул хIужабазул хIакъалъулъ.
«Исана республикаялда, 11 моцIида жаниб, нухазда низам хвезабиялъул 88300 хIужа ккун буго. Гьезда гьоркьоса 3600 низам хвезаби мехтелалдалъун ккун буго. Низам хвезабурал тIасалъугьаян халкъалда цере гьаризе тIамулеб гIадатги рекIее гIуна дие», — ян бицана Александр Шалагиница.
2024 соналде щвезегIан Дагъистаналда 552 километралъул манзилалда нухал къачIазе ругин бицана ДРялъул транспорталъул ва нухлул магIишаталъул министрасул заместитель Сиражудин Айгумовас.
«Гьеб проект гIумруялде бахъинабилъе федералиябги республикаялъулабги бюджеталдаса биччалеб буго 10 миллиард гъуруш. 2020 соналде республикаялда лъезе буго 520 светофор», — ян абуна С. Айгумовас.
ДРялъул сахлъицIуниялъул министрасул тIоцевесев заместитель Фейзулагь ХIабибулаевас бицана чанго соналъ цебе шагьранухазда аскIоса гIебеде гIуцIун рукIарал «медицинаялъул хъулухъазул» хIакъалъулъ. «Республикаялда букIана гьединаб ичIго «хъулухъ». Амма, батIи-батIиял багьанабиги ратун, гьел бакIалъулал больницабазде гочинаризе ккана. Федералиял нухазда ккарал ДТПязда лъукъаразе хехаб кумек гьабулаан гьез. Гьанжейин абуни шагьараздаса хехаб кумек бачIинегIан чIезе кколел руго къварилъиялде ккарал», — ан кIалъана Ф. ХIабибулаев.
Россиялъул МВДялъул ГУОБДДялъул начальник Михаил Черниковас лъазабуна, нухазда гIадамазул гIумру хвасар гьабиялъул мурадалда, «медицинаялъул хъулухъал» рукIаралго бакIазде тIадруссинаризе хIаракат бахъизе бугин.
