ДРялъул бетIер дандчIвана районазул бутIрулгун

ДандчIваялда гIахьаллъана ДРя­лъул бетIер Владимир Васильев­ги, ДРялъул хIукуматалъул пред­седатель Артем Здуновги, ДРя­лъул бетIерасулги ДРялъул хIу­куматалъулги администрациялъул нухмалъу­лев Владимир Ивановги, ДРялъул тIабигIиял сурсатазулги экология­лъулги министр Набиюла Гъарачаевги.
ДандчIваялда бицана муниципа­лиял районазул социалиябгун эко­но­микияб цебетIеялъулги 2018 со­налъул анлъабилеб июлалда, В. Ва­сильевасул хитIабалда рекъо­н, РФялъул президент Владимир Путиница кьурал тIадкъаял тIуразариялъулги хIакъалъулъ.
Болъихъ районалъул бетIер Му­хIамад ПатхIулаевас бицана, рагъулаб городокалда букIараб «Ме­седил кIул» абураб лъималазул ах муниципалитеталъул мулклъун гьабиялъулги, Болъихъ росулъ сахлъицIуниялъул комплексги (200-ялдаса цIикIкIун млн гъуршил багьаяб) хIавузги (110-ялдаса цIикIкIун млн гъуршил багьаяб) разе проектал хIадуриялъулги, 2019 соналде тасдикъ гьабураб республикаялъул бюджеталда, АнсалтIаса РахатIе ва гьенисаги Болъихъе бачараб лъел мухъалда лъим бацIцIад гьабулеб алат рекъезабиялъул мурадалда, 110 млн гъуруш ва АнсалтIа росулъ спортзал баялъе 34,2 млн гъуруш бихьизабиялъулги хIакъалъулъ.
Гьелде тIадеги, районалъу­л бетIерас абуна педагогиялги меди­циная­лъулги хIалтIухъабазе базе бугин гIемертIалаяб мина. Болъихъ районалъу­л централияб больницаялда лъезе бугин МРТ ва, РФялъул Оборонаялъул министерствоялъул­гун гьабураб къотIиялда рекъон, бан бахъинабизе бугин кьишни батIагьабулеб комплексги рагъулаб городокалде унеб лъим бацIцIад гьабулеб алатги. Бицана гьес ЦIумада районалъул Инхокъвариса Болъихъ районалде лъим бачиналъул масъала букIиналъулги. Гьеб тIубан хадуб ЦIумада районалъул анкьго ва Бо­лъихъ районалъул щуго росдае лъим щвезе рес буго.
ЦIумада районалъул бетIер АнвархIажи Вечедовас бицана Гьигьалъ ва КIванада росабалъ школал ралел ругилан. Гьелъие биччан буго 370 млн гъуруш. Гьес ракIалдещвезаруна ТIаса Хъваршиниса Хушеталде нух бахъиялъулги, ТIисси ва Гьакъо росабалъ школал раялъулги, Лъондода – Агъвали – КIочIали лъим бачиналъулги масъалаби. Гьел тIуразариялъул мурадалда тIадкъаял кьуна Владимир Васильевас. «Гьел руго улкаялъул президентасул тIадкъаял ва гьел тIуразе ккола, хабар гьечIого», — ян лъазабуна гьес.
Вечедовас борхана ЦIумада районалда ХIабиб НурмухIамадовасул цIаралда бугеб спортивияб комплекс баялъул масъалаги.
Шамил Закаряев,
«ЦIумада район» МРялъул администрациялъул хIалтIухъан