Дагъистаналда — Кострома областалъул къоял

Экономикаялъе ва маданияталъе пайдаяб

22 октябралда ДРялъул хIукуматалъул председатель Артем Здунов дандчIвана Дагъистаналде сапаралъ вачIарав Кострома областалъул губернатор Сергей Ситниковгун.
Гьес бицана Кострома областалдаса рачIарал вакилзабазул сапаралъул мурад гIицIго экономикияб рахъалъул гуребги, культурияб программа гъорлъ бугеб букIиналъулги.
«Нижеца Дагъистаналде рачун руго творческиял коллективалги», — ян абуна губернаторас. Гьес бицана Дагъистан риидал хIухьбахъиялъе лъикIаб бакIлъун бихьизабулин жидеца Кострома областалда гIумру гьабун ругезда.
«Дун дандчIвана республикаялъул цо пуланаб гостиницаялъул бетIергьангун ва туризмалъул къокъаби хисун цоцахъе ритIиялъул къотIи-къайги гьабуна. Дагъистаналда хIухьбахъи гьабулезе рекъарал багьабиги руго. Нижер область рикIкIуна рохьал гIезариялъул ва гьелъул хIалтIи гьабиялъул рахъалъ цебетIураб бакIлъун. Дагъистаналда минаби раялъул рахъ цебетIолеб букIин хIисабалдеги босун, нужееги нижееги лъикIаб пайда ккелаан гьеб рахъалъ хIалтIи цадахъ гьабулеб бугони», — ян абуна Сергей Ситниковас.
Костромаялъул творческиял коллективаз ГIурустеатралда бихьизабуна «Кинабго лъикIабщинаб нужее» абураб концерт, Тахо-Годил цIаралда бугеб миллияб музеялда тIобитIана «Костромаялъул ракьалъул искусство» абураб выставкаги.