Россиялъул президент Вла­ди­­мир Путиница ХIабиб Нурму­хIа­мадовасда баркана UFCялъул чем­пионасул титул цIуни.

 

Гье­лъул хIакъалъулъ Дагъистана­лъул речIчIухъанас журналистазда бицана рагъ лъугIун хадуб букIараб пресс-конференциялда.
ТIадагьаб цIайиялда абсолютияб речIчIухъанлъиялъул чемпионаталда (UFC) босараб бергьенлъи ХIабиб НурмухIамадовасда баркана ДРя­лъул бетIер Владимир Васильевасги.
«ХIурматиял дагъистаниял ва спорт бокьулел! Гьеб сор­доялъ нужер гIемерисел кьи­жи­чIо нилъер ракьцояв ХIабиб Нур­мухIамадовасулги Конор Макгре­горилги къеркьеялъухъ балагьизе анищалда рукIиналъ.
ГIицIго Дагъистаналъул гуребги, тIолабго Россиялъулго рахIатхвей букIана нилъер спортсменасул бергьенлъиялдалъун лъугIараб къеркьеялъул хIасил кинабдай ккелебин абун. Баркула ХIабиб НурмухIамадовасда ва спорталъул гьеб тайпа бокьулел киназдаго кIвар бугеб къеркьея­лъулъ босараб кIудияб бергьенлъи. Журарал единоборствабазул рахъалъ Дагъис­таналъул речIчIухъанас Россиялъул спорталъул тарихалда цебеккунго хъван букIана жиндирго цIар UFCялъул чемпионасул титул щварав тIоцевесев спортсмен хIисабалда. Жакъайин абуни гьес иргадулаб нухалдаги бихьизабуна жив бищунго тIадегIанаб даражаялда рикIкIине мустахIикъав вукIин. ХIабиб НурмухIамадовас кидаго бихьизабулаан къвакIараб, таваккалаб хасият ва хасаб мурадалде щвезе жигар бахъулеб букIин. ТIолабго дунялалдаго гьес бихьизабуна Дагъис­таналъул спортсменасул бугеб кIудияб махщел ва бажари. Гьев ккола къезеги къун цониги нухалъ октагоналдаса нахъе инчIев спортсмен. НурмухIамадов ХIабиб лъугьана гIолилазе мисаллъун, киналго дагъистаниязул ва россия­лъулазул чIухIилъун. Гьайгьай, гьесул бергьенлъи ккола гIемерсоназулаб ва тIадчIараб захIматалъул хIасил. Дагъистаналъул ЦIумалъе гьарула цIи-цIиял спортивиял бергьенлъаби», — ян хъвалеб буго ДРялъул бетIерасул баркиялда.