Питна бекьизе бегьуларо
Дагъистаналда тIобитIана Россиялъул миллияб антитеррорияб комитеталъул (НАК) данделъи
Гьелда гIахьаллъана НАКалъул председатель, Россиялъул ФСБялъул директор Александр Бортниковги, РФялъул миллияб гвардиялъул федералияб хъулухъалъул директор, РФялъул миллияб гвардиялъул бетIерав командующий Виктор Золотовги, РФялъул цIех-рехалъул комитеталъул председатель Александр Бастрыкинги, хъаравулзабазул федералияб хъулухъалъул директор Дмитрий Кочневги, РФялъул жанисел ишазул министр Владимир Колокольцевги, РФялъул сахлъицIуниялъул министр Вероника Скворцоваги, СКФОялъул субъектазул бутIрулги.
Данделъи нухда бачана Александр Бортниковас. Гьес бицана, къуваталъулал хъулухъазулги хIукуматалъул идарабазулги цадахъаб хIаракаталдалъун, Северияб Кавказалда кIиго нухалъ дагьлъанин терроризмалъулал такъсиралин абун. «Гьеб хIаракаталъул хIасилалда, мукъсанлъана хъачагъазе гIадамазухъа щолеб букIараб гIарцул ва цогидал сурсатазул кумек. Гьединал хIужаби хехго тIатинарулел руго низам цIунулел идарабаз. Бажарулеб гьечIо гьезухъа рагъуе махщел бугел аскарал гIуцIунги. Исана тIоритIана оперативиялги рагъулалги тадбирал. Гьезул хIасилалда анлъго теракт гьабизе биччачIо, ккуна 63 хъачагъ ва гьезул 142 кумекчи. ЧIвана 50 хъачагъ, гьезда гьоркьор руго Чачаналдаги Дагъистаналдаги вахIшиял ишал гьарулел рукIарал къокъабазул бутIрулги», — ян бицана гьес.
НАКалъул председателас кIварбуссинабуна, терроризмалъул хIинкъи жеги хутIун букIиналдеги. ХIинкъи бугеб къапилаялда гьоркьор гьес рехсана ГIагараб Бакъбаккуда рагъал унел улкабаздаса тIадруссунел кавказалъулал. «Гьез тIибитIизабулеб буго заралияб идеология гIолилазда гьоркьоб, хIалтIизарулел руго жеги балугълъиялде рахинчIелги», — янги абун, Бортниковас рехсана Грозныялдаги Гъизляралдаги килисабазде гьужум гьабиялъул хIужаби ва регионалда гIумру гьабулел батIи-батIиял диназул вакилзабазда гьоркьоб питна бекьизе хIаракат бахъулеб бугин абураб пикруги загьир гьабуна.
Данделъиялда бицана терроризмалде данде къеркьеялъул мурадалда гьаризе ругел тадбиразул хIакъалъулъги.
