Ракьцоял – республика бахун къватIир

Москваялда — дагъистаниязул бизнес-годекIан

 

19 апрелалда Москваялда ДРялъул вакиллъиялда тIобитIараб тадбиралда гIахьаллъи гьабуна 70-ялдасаги цIикIкIун дагъистанияс

Аслияб къагIидаялда гьел ккола бизнесменалгун студентал. Тадбир нухда бачана МахIачхъалаялъул бизнес-жамгIияталъул (БИСОМ) председатель ГIабдулхIаким Пахрудиновас, ва гьеб данделъиялъул аслияб мурадги букIана Москваялда БИСОМалъул филиал рагьи.
Данделъиялъул байбихьуда бихьизабуна БИСОМалъул хIалтIул хIакъалъулъ бицунеб документалияб фильм. Цинги ГIабдулхIаким Пахрудиновас бицана гIуцIиялъул церетIеязул, хIалтIул хIалбихьиялъул, гьаризе ругел ишазул хIакъалъулъ. Ассоциациялъул филиалалъул нухмалъулевлъун тана ГъазимухIамад Гъазиев.
Данделъиялда кIалъарай Дагъис­таналъул Москваялда бугеб вакиллъиялъул нухмалъулей Изумруд Мужаидовналъ цIирагьараб гIуцIиялъе гьарана икъбал ва бицана Дагъистаналъул бизнесменазул хIакъалъулъ, экономика цебетIолеб букIиналъул. «Минаби ва гIадамазе хIажатал цогидалги бакIал раялъулги гIадамазе батIи-батIияб хъулухъ гьабиялъул рахъалъги Северияб Кавказалъул федералияб округалда республика буго цебесеб бакIалда. Гьединго тIадегIанаб даражаялда буго росдал магIишаталъул нигIматал гIезариги. ЦIияб гIуцIиялъин абуни квербакъила республикаялдаги Москваялдаги ругел дагъистаниял-бизнесменазул бухьен щула гьабиялъе», — ян бицана гьелъ.
Тадбиралдаса хадуб «Россия — киназего» абураб интернет-порталалъул мухбиралъ гара-чIвари гьабуна данделъиялъул гIахьалчагIазулгунги. Масала, ГIабдулхIаким Пахрудиновас бицана жив цIакъ рази вугила Москваялда МахIачхъалаялъул бизнес-жамгIияталъул ассоциация рагьиялдаса.
— Гьадиналго гIуцIаби рагьизе руго Россиялъул цогидал шагьараздаги. Нижер ассоциациялъул аслияб масъалаги ккола бизнесменазул къадар гIемерлъи гуреб, гьезие гьабулеб кумекалъе квербакъи. Ургъулел руго цIиял проектал, гIенеккула цогидаз бицунелъухъ, гьединго хIаракат бахъула цогидазул хIалбихьиялдаса пайда босизеги, — ян абуна ГI. Пахрудиновас.
ГъазимухIамад Гъазиевасул хIакъалъулъ бугеб жиндирго пикру загьир гьабуна гьесул эмен, «Российская топливная компания» ОАОялъул вице-президент Жамалудин Гъазиевас.
— Дир хъизамалъего гьеб ккола жавабчилъи цIикIкIараб иш. Дун вохарав вуго Москваялда цIалулел ругел дагъистаниял-студентазул Союзалъул председательлъун вас вукIиналдасаги. Гьединго гьев ккола МГУялъул студентазул советалъул председательги, шагьаралъул Думаялъул депутатасул кумекчиги, МГУялъул советалъул членги, тахшагьаралда бугеб Дагъистаналъул вакиллъиялда цебе бугеб гIолилазул советалъул членги. Кинабго цадахъ босани, гьеб ккола цIакъго кIудияб жавабчилъи. РакI­чIола гьес цIияб хIалтIулъги бихьизабилин хIалтIизе бугеб гъираги махщелги, — йилан абуна гьес.
Москваялда вугев предприниматель МухIамад Кунаевасги абуна живги вохарав вугила Москваялда цIияб гIуцIи рагьиялдаса.
— Ниж гьадингоги кидаго данделъулаан. ЦIияб ассоциациялъ тIадеги кумек гьабизе буго цолъиялъе ва цадахърекъон хIалтIиялъе, — ян абуна гьес.
ПатIимат Расулова