Нухмалъиялде – гIолилал
Артём Здунов: «Кадрабазул резерв гIуцIи букIине ккола аслияб масъалалъун»
Нухмалъиялде – гIолилал
Артём Здунов: «Кадрабазул резерв гIуцIи букIине ккола аслияб масъалалъун»
ДРялъул хIукуматалъул председатель Артем Здуновас тIобитIараб данделъиялда бицана республикаялъул нухмалъиялъул кадрабазул нахърател хIадуриялъул хIакъалъулъ. «Резервалде рищарал хIалтIухъаби хIажат руго ДРялъул бетIерасги ДРялъул хIукуматалъги хъулухъалдаса эркен гьарурал хIакимзабазул бакIалда тезе», — ян абуна республикаялъул премьерас.
«ХIалтIухъаби ралагьулеб мехалда нижеда бичIчIана, батIи-батIиял форумазда жидер гьунар загьир гьабурал пагьмуял гIолилалги ракIбацIцIадал хIакимзабиги республикаялда гIезегIан рукIин. Нижее хIажат руго камилаб лъайги бугел, хIукмаби къабул гьарунги бажарулел хIалтIухъаби. Гьайгьай, хъулухъалде росизе руго къецалъул хIасилалда. Гьеб къец тIобитIулеб мехалда ахIизе руго СМИязул вакилзабиги», – ян бицана Артём Здуновас.
Нухмалъулезул кадрабазул резервалда жалги гьоркьоре ккезареян документал кьурал дагъистаниязул хIакъалъулъ бицана ДРялъул бетIерасулги ДРялъул хIукуматалъулги администрациялъул Пачалихъияб хъулухъалъулги, кадрабазулги, пачалихъиял шапакъатазулги управлениялъул нухмалъулев Артур Исрапиловас. Бицана хIалтIизарулел цIиял къагIидабазул хIакъалъулъги. Масала, резервалъул букIине буго кIиго бутIа: базовиябги перспективиябги (гIолилазул). Резерв букIине буго кидагосеблъун ва гьоркьоса къотIичIого цIигьабизе буго.
«20 марталде щвезегIан къабул гьаруна документал. Нижехъе документал рачIана 1091 чияс. ХIисабалде босулеб буго кандидатасул лъайги, пачалихъияб гражданияб хIалтIул хIалбихьиги, цогидаб хIаракатги. 349 чиясул документал рикIкIана квалификациялъул тIалабазда рекъонкколареллъун. Халгьабиялъул кIиабилеб бутIаялда кандидатазе кьезе буго тест. Гьелда буго 75 суал. Гьезие жавабал кьезе ккола компьютералдасан. Тест тIубан хадуб кандидатас хъвазе ккола эссе (цо гьумер)», – ан бицана Исрапиловас.
Данделъиялъул ахиралда хIукму гьабуна къецалъул кIиабилеб даражаялда гIахьаллъизе бегьулел кандидатазул сияхI тасдикъ гьабизе.
