FaceBook  in  yt  rss

Зобал, тIаса лъугьа дир гIанчIлъиялда Зобал, тIаса лъугьа дир гIанчIлъиялда Зобал, тIаса лъугьа дир гIанчIлъиялда

ХIамзатил Расулил хьолбохъ ПатIимат гIадайги, ГIабасиласул хьолбохъ Савдат гIадайги гIадан МухIамад Сулимановасда хьол­бохъги йикIарайани, гьесул асаразулги цIаралъулги къиса батIияб букIинаанилан хъвана Дагъистаналъул халкъияй шагIир Залму Бати­ровалъ.

Зобал, тIаса лъугьа дир гIанчIлъиялда

 

 

 

Гьеб битIарабги буго. Араб ан­кьалда гьел рагIабазул магIна да­гьабги загьирлъана.

 

ГIедегIулел рукIана Савдат-эбе­лалъухъе. Гьеле гьей хIикматай хIурулгIиналъ Г1абасил Мах1ама­дил цIар лъуна цIвабзазда аскIоб. Жакъаги гьелъухъе рачIунел руго, шагIирасда цадахъ гьелъ г1умру­ялъго бараб ва киданиги жинхъе унеб нухда ч1ах1 бижизе гьечIеб гIаданлъиялъул сиялъухъе. Гьеб сидул щибаб ганчIилги буго жин­дирго къиса. ГIадамазде бугеб хIалхьолареб рокьул къиса.

 

 

Ракьалда бугеб алжанилан абун ГIабасилас тараб гьесул ЛъагIилухъ росулъе гIедегIун рачIунел рукIана магIарулалги цогидаб миллаталъ­ул вакилзаби-шагIирзабиги. Гье­сул цIар кьураб росдал школал­да рагьулеб букIана Россиялъул мустахIикъав художник ГIали МухIамадовас шагIирасе гьабураб памятник-бюст.

 

МугIрузда тIибитIун бугеб магIарулллъиялъул гьуинаб махIги цIулаго, кIичI-кIичIарал нухалги нахъа толаго, щвана ЛъагIилухъе. Гьенире гIагарлъанагIан, данде­го бачIунеб бугин кколеб букIана шагIирасул рухI, рагIулеб букIана гьесул гьаракь.

 

Гьалеха, макъратIисалъ кинигин, жиндехунго гIадамал цIалеб авар поэзиялъул гучаб рукъ, ГIабасиласул мина:

 

- Дир рукъ бечелъула,

                                     баче кверилан,

Кисаниги гьобол рагьде вахани.

БугIун бакъул цIола,

                                   духъе щванил

Щибулев вугеван

                                 гьудул вачIани…

 

 

Гьале жакъаги ГIабасиласул гъас­да бакараб цIадухъе вачIанщинав чи – унго-унгоги букIараб берци­наб горсвери шагIирасул гъанси­тохъ. Гьале гьадинаб гIумруялъул берцинаб ахирги ракьалда тун арав шагIирасухъ урхъараз цIуна азбар- къоно. Гьадале гьадал тIаде рала­гьарал рорхатал мугIрузги согIал кьураби-парсазги цадахъ лъугьун гъолеб букIун батила шагIирасул асаразда рухIги. Гьале росдал сухъ­махъалги. Гьанисан, лъимерлъиялъ­ул чангиталъ хадувги цIан, чанги хьвадун ватила халкъияв шагIир. Гьадале гьадаб, рукъалде тIаде ба­лагьараб гIажаибаб берцинлъи­ялъул гогьаралъул мегIералъул тIогьисан, тIолабго Аваристаналда рагIиледухъ, гIадамазде бугеб гьал­долеб рокьул цIураб керенги рагьун ахIараб шагIирас:

 

- Халкъги ВатIанги кколев,

Ккани, ахIуд вахъунев,

БачIани, кечI ахIулев –

Дун росулъа вас вуго… - ян

 

ГIабасилав абадиялъе хутIана ро­сулъа васлъун.

 

Гьале тIаде щвана шагIир чIаго гьа­вулеб лахIзат. ШагIирасул хIурулгIин Савдатица рагьана памятник. Гьениб букIана Савдатил магIуги, гIадамазул рохелги, шагIирзабазул шагIирасде бугеб рокьиги. Кодоб пандурги ккун, хъахIабросулъевги щвана тIаде. За­маналдасан Камилил Баширги гIунтIана. ГIакаро магIарда гIунарай Сабацаги бицана жиндирго рокьул къиса.

 

ГIабасиласул асаразул багьадур­заби гьоболлъухъ ахIун рукIана росдал гьоркьохъеб школалъул цIалдохъабаз ва Авар театралъул ак­тераз. Гьез рихьизаруна шагIирасул пьесабаздаса бутIаби. Хадур дан­делъана росдал клубалде. Берцинаб байрамалде сверана шагIир ракIалде щвезавиялъул къо.

 

 

ГIабасиласул шигIрабазул улка­ялъул даимал гьалбаллъун ругел магIарул шагIирзабаз рикIкIана гье­сие сайгъат гьарурал кучIдул, бица­на гьесул гIумруялъул ва творчесто­воялъул хIакъалъулъ.

 

 

Рагьана памятник. ЦIидасанги цIилъана шагIирасде бугеб рокьи. Дагьабги гьелегьана гьесул гъанси­тохъ бакараб гьудуллъиялъулги ада­бияталъулги цIа.

 

Ва кечI рикIкIунев вугев шигIи- расул гьаракьалъ нуха регIана гьал­бал:

 

- Зобал тIаса лъугьа

                                дир гIанчIлъиялда -

ГIумруялъ къуличIеб

                               дир бетIералда,

Азарго как бугеб дуниялалда

Дицаго ургъараб

                              рокьул диналда.

 

ТIадруссунел руго ЛъагIилухъа. Нахъехун толел руго шагIирасул шигIраби тIегьарал, тIирщарал ра­салъабиги, мугIрул-щобалги, даим­лъиялде араб шагIирасул тIадегIанаб цIар дандерижилъун гаргадарал рос­дал къватIалги, гьенире гIадамал къабул гьарулел сухъмахъалги:

 

- Дун гIоле-гIолезул

                              гIолилав вуго,

ГIолохъанлъи гIадаб

                              гIумру лъаларо;

ГIанчIал хиялазул

                               нухлулав вуго,

НухтIа вукIин гIадаб

                              рохел лъаларо…

 

Жакъаги нухда сапаралъ вуго шагIир. ГIадамазул ракIазулъе лъу­раб рокьул кьолъун ругел гьесул асарал жакъаги гара-чIварулел руго нилъгун.

 

ЛъугIана халкъияв шагIирасулгун букIараб иргадулаб дандчIвай. Гьеб букIана ГIабасиласулгун къо-мех лъикI гьабулеб иргадулаб лахIзатги. ГIумруги хвелги. Авалги ахирги. Къисматги къисаги. Рохелги магIуги. ДандчIвайги ратIалъиги. Гьеб кинаб­гоги цолъун лъугьараб шагIирасул гъасда бакIараб цIаялъ цIидасанги нухарегIана гьалбал.

Прочитано 128 раз
Другие материалы в этой категории: « Ахиралде щвезегIан чIола нилъ

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий обязанности главного редактора:

Умахан Амирханович Умаханов

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх