Масъалаби гIемераб гьанжезаманалъул жамгIияталда бищунго кIвар кьезе кколеб суал буго гIолеб гIелалъе тарбия кьей. Гьанжесел гIолилаз санго гьабуларо миллияб парталалъулги, халкъиял гIадатазулги, гIадамазда гьоркьов вукIа-вахъиналъул низам цIуниялъулги. Гьединаб хьвада-чIвадиялъе квербакъула нусгоялдаса цIикIкIун телеканалалдаса бихьизабулеб жоялъги, социалиял гьиназдасагун интернеталдаса щолел баяназги. Гьезул кьучIалда куцалеб цIияб гIелалъе хасиятаблъун лъугьун буго хъачIлъи, чIахIиязул адаб тей, чIужугIадан хIакъир гьайи, чамгIаллъи. Жеги гIакълу цIубачIел ва гьанжего гьанже балугълъиялде рахунел гIолилазда гьединаб хасият берцин бихьула, ва гьел ругьунлъула гьелда рекъон хьвадизе.
Гьединаб ахIвал-хIалги букIаго, Дагъистаналъул лъай кьеялъул цIакъго «церетIурал» хIаракатчагIаз школазул цIалул планаздаса нахъе бахъана «Дагъистаналъул халкъазул маданият ва гIадатал» абураб дарс. 1992 соналдаса нахъе гьеб кьолаан республикаялъул школазул ункъабилеб ва 8-11 классазда. Гьел дарсал кьезе байбихьана лъай кьеялъул унго-унгояв патриот ва халкъияб педагогикаялъул магIна бичIчIулев министр Бадави ХIажиевасулги ДНИИПалъул директорлъун вукIарав ХIамидуллагь МухIамадовасулги хIаракаталдалъун. Тарбия кьеялъул рахъалъ нилъер халкъазул букIараб гIасрабазулаб бербалагьиялдаса махIрумлъулеб буго гьанже гIолеб гIел.
Халкъияб педагогикаялъул аслу буго халкъияб этикет. Этикет (oppetuquette — ярлык, этикета) ккола жамгIияталда гьоркьор рукIа-рахъиналъулги хьвада-чIвадиялъулги низам. Гьелъул хIубилъунги ккола халкъиял гIадатал, моралиял къанунал, кагътида хъвачIониги, щивасул рекIеда бикIун цIунараб жамгIияталъул закон.
Дагъистаналъул халкъазул буго гIицIго жиндие хасиятаб этикет – гьелдалъун гьеб батIабахъула Россиялъул цогидал халкъаздаса. Гьанже гIемерисез гьелда абула «менталитетилан». Дагъистаниязул этикеталъ тIалаб гьабула цогидав чиясул адаб гьаби, гьесул напс хIакъир гьабунгутIи, дандеккунгутIи, жахIда, рагъ- кьалалде сверизабичIого, маслихIаталдалъун битIараб нухде бачин. Этикеталъ малъула батIи-батIияб ригьалъул гIадамалгун, чIужугIадангун, бечедав-мискинавгун, хIакимчиясулгун ва цогидалгун вукIа-вахъунеб къагIида.
ТIабигIаталъги, тарихиялгун социалиял ва экономикиял шартIазги квербакъун, дагъистаниязул этикеталъул аслиял рахъаллъун ккезаруна гьадинал гIадатал: цоцазе хIалае рахъин, гьоболлъи цIуни, мадугьалгун рекъон вукIин, кьураб рагIи кквей, халкъалъул цолъигун гъунки, мадугьалихъ гIумру гьабулеб халкъалъулгун гIаммаб мацI бати ва цоцазул адаб гьаби, хъизамалъул, гьавураб рукъалъул ва эбел-инсул адаб гьаби, херлъараб мехалда, эбел-инсул тIалаб гьаби, херазул гIакълу кIодо гьаби, чIужугIаданалъул намусги гIумруги цIунизе рахъин (гьей гIагарай кколей гьечIониги яги лъазего лъаларей ятаниги), гIагарлъиялъулгун бухьен кквей ва гь.ц.
Халкъалъул этикеталъул тIалабал рессун руго кицабигун абиязулъ. Масала: «Инсанасул мацIалда буго гьоцIоги балагьги», «ЧIахIиязул адаб гьабуларесда адабго лъаларо», «ЛъикIаб рагIуца гамачIги хIеккинабула», «Гьабураб лъикIлъи, ралъдалъе реханиги, гIадада холаро», «РикIкIадав вацасдаса аскIов вугев мадугьалго лъикI» ва гь.ц.
Этнографиялъул ва цогидал гIелмиял тIахьазул баяназда рекъон, халкъияб этикеталъул тIалабалги цIунун куцарав чиясулъ букIуна: ритIухълъи, хIилла-рекIкI гьечIолъи, жахIда гьечIолъи, щивасдехун ракI разияб бербалагьи, кьураб рагIуе ва гьабураб къотIуе хилиплъунгутIи, нич, хIеренлъи, гурхIел-рахIму, цогидаз гьабураб квешлъиялдаса тIаса лъугьине бажари, гIаммаб ишалъулъ гIахьаллъизе гъира, чорокаб мацI бицунгутIи, мацIихъанлъиялдаса рикIкIалъи ва гь.ц.
Дагъистаналъул халкъияб педагогикаялъул аслиял тIалабал руго гьадинал:
1) эбел-инсул адаб цIуне, эбелалъул тIадегIанлъи кIочонге;
2) эбел-инсуда цебе ясалъулаб (васасулаб) борч тIубай;
3) чIахIиязул адаб гьабе;
4) цIуне ва щулалъизаре гIагарлъиялъулгун бухьенал;
5) гьоболлъи цIуне;
6) цIуне чIужугIаданалъул къадру, напс; гьей йигеб бакIалда адабалда вукIа-вахъине лъай;
7) къадруял, рагIи билълъарал херал гIадамазул тIадегIанлъиялъул адабги гьабулаго, цIуне халкъалъул (жамагIаталъул) къиматаб цIар;
8) кьураб рагIи ккве, бараб гьа тIубазабе;
9) квербакъе (моралиябгун материалияб рахъалъ) гIагарал чагIазе (бесдалазе, унтаразе, щокъазе, язихъазе);
10) цоцазе кумек гьабе ва гь.ц.
Гьединал малъа-хъваязул кьучIалда куцалаан нилъер умумуз лъимал. Гьезда рекъон хьвада- чIвадулищалиги балагьун, кьолаан гIолилазе къиматги. Эбел-инсул къадру хвараб иш гьабунгутIизе хIаракат гьабулаан лъималазги. Школалда цIалулел лъималазе тарбия кьеялъул программаялда рукIине мустахIикъаллъун рихьула нижеда цереккун рехсарал тIалабал.
РукIуна гьадинал хIужабиги: рокъоб эбел-инсуца кьолеб тарбия рекъонкколаро рукъ тун къватIиб букIунеб лъимадул хьвада- чIвадиялде. Масала, чIужугIадан хIакъир гьайизе бегьулареблъи лъаниги, пуланав васас чорокал рагIаби абула классцоялде. Гьедин ккола малъарабги щибаб къойил бихьулебги данде кколареб мехалда. Гьединлъидал дарсида, классалъул данделъабазда ва цогидал тадбиразда гIолилал ругьун гьаризе ккола халкъияб педагогикаялъул малъа-хъваял хIалтIизаризе.