- ЦIалиялъул кьибил - кьогIаб, пихъ - гьуинаб букIунин хъван буго Аристотелица. Гьединлъидал дунги цIалула жавабчилъиги би­чIчIун. Къойилаб низамги дир цIакъ хIалуцараб буго. Масала, радал сагIат микьгоялдаса кIиго тIубазегIан институталда вукIуна. Цинги, къаси кIиго тIубазегIан кафеялдаги хIалтIула. Дир кьижулеб заман буго ункъо сагIат. Дирго гIумруялъул хIалбихьиялдаса пайдаги босун, гIолилазда, хасго студентазда абила: «Эбел-эменги росу-ракьги тун, цIализе рачIарал нилъер, лъабил къиматазда цIали ккола нилъго нилъецаго махсараде кквей. Щивасда тIадаб буго гIолохъанго букIинеселда тIад ургъизе ва гIумруялъе хIажалъизе бегьулеб гьунар-махщалие ругьунлъизе», - ян.
Мусакъадил эмен МухIамад ккола шофер, эбел Музират – медсестра. Амма эбел-инсул кумекалде ккечIого тIувазе бокьиялъ гьев кафеялда официантлъунги хIалтIулев вуго.
ДГУялде лъугьиналде цебе Мусакъадица лъикIал къиматазда лъугIизабуна ДГПУялда цебе бугеб юридикияб колледжги. Гьесие бокьун букIана ДГУялъул юридикияб факультеталде лъугьине, къисматалъ вачана экологиялъул институталде. Гьелдаго цадахъ Мусакъади заочно цIалулев вуго ДГУялъул юридикияб факультеталъул «таможенное дело» отделениялдаги.
ДГУялъул экологиялъул инсти­ту­та­лъул методист Муслимат Абакаровалъ бицана: «Бищун лъикIал студентазда гьоркьоб цIар рехсола Муса­къадилги. Гьев вуго сабураб гIамал-хасияталъул, гIатIидаб ракIалъул, ай кинабго рахъ камилав гIолохъанчи. Гьес гъираялда кумек гьабула цадахъ цIалулезеги», - ян.
- Дун талихIав чилъун рикIкIуна дицаго. Эбел-эменги преподавательзабиги дир цIалудаса рази руго. Гьеб кколарищ талихI? Квеш ккараб жо буго самбоялъул, гугариялъул яги грэпплингалъул рахъалъ тренировкабазде хьвадизе дие заман гIоларого букIин», - ан бицана М. МухIамадовас.