2019 соналда 13000 хIаким та­михIалде цIан вуго республикаялда. 2018 соналде дандеккун, 3000 чиясдалъун цIикIкIанин гьеб сияхIин абураб баян кьуна республикаялъул прокурор Алексей Ежовас информ­алатазе.

Гьеб гуребги, прокуратураялъу­хъа бажарун буго хIалтIухъабазе кье­зе кколеб букIараб 80 млн гъурщил налъи лъугIизабизеги.
13000 хIакимасе гIадлу гьабун батани, кIудияб къагIида ккун бугилан абила газета цIалулез. Амма щибха гьелъ кьураб?
ХутIарал хIакимзаби, гьеб дарсги бичIчIун, лъикI хIалтIизейищ лъугьарал?
Гьеб щакаб иш бугин бицана «ХIакъикъаталъе» жамгIияв хIара­катчи ГIисалмухIамад Набиевас:
«10 ватаниги, 13000 ватаниги, хIаким гIадлуялде цIанин абураб жоялъ хисизе жо бихьуларо дида. ТIоцебесеб иргаялда абуни, бичIчIулеб гьечIо гIадлуялде цIан ругин абураб жоялъул магIна. ГIакIайищ гьезде къотIараб, жа­магIаталъул хIалтIудейищ ритIарал яги жанирищ тIамурал?
КIиабизе, гьаб жанисеб система хисичIого, цониги хIакимги кантIизе гьечIо. Киналго гьел руго чванта киндай бечед гьабилаян пикруялда», — ян абуна жамгIияв хIаракатчияс.
Гьелдаго релълъараб пикру бу­го «Черновик» газеталъул полити­кияв обозреватель МухIамад Му­хIа­мадовасулги:
«Чамалиго хIаким тамихIалде цIа­нин абураб хабар цо макъалаялъул бетIер берцинлъиялъул мурадалда къватIибе кьей гурони, гьелъ гьабин абун кьезе цIияб жо дида бихьулеб гьечIо. ТамихIги букIуна батIи-батIияб. ЧIванкъотIун бичIчIулеб гье­чIо кинаб тамихI гьезие гьабурабали. Гьединго цониги гIайиб ккарав хIакимчиясул цIарги рехсон гьечIо гьениб. Цогидал хIакимзабазе дарслъун букIинищ гьебилан гьикъани, букIинин абизе кIоларо».