СагIтазул устарасул театр

Каспийскалъул «ТIоцебесеб галереялда» рагьана
«СагIтазул устар ГIабдула МухIамадовасул театр» абураб гIадатияб гуреб выставка

ГIабдула лъаларев чи Каспийскалда ватиларо. Ленинил ва Стальскиясул къватIал цолъулеб бакIалда бугеб МухIамадил сагIтал къачIалеб мастерскаялде щвечIев чи къанагIат ватила шагьаралда. Амма гьаб нухалда гьесулъ тIатана суратал рахъи­зе бугеб махщел.
Гьавуна ва гIуна МухIамад Каспийск шагьаралда. 1979 соналда цIализе лъугьана МахIачхъалаялда бугеб гIадамазе хъулухъ гьабулеб комбинаталде. Гьесие гьениб щвана «СагIтал къачIалев устар» абураб махщел.
АнцIго соналъ цебе гьес байби­хьана гIагараб Балхар росдал гIа­дама­зул гIумруялъул хIакъалъулъ бицунел театралиял макетал гьаризе.
— НасихIатчи, лъикIав гьудул, ме­седил тIагIелазул устар Малик Му­саевасул квербакъиялдалъун МухIа­мадилъ тIатана цоги махщел, — ан абуна выставкаялъул куратор Жамиля Дагировалъ.
Заманалдасан гьединал макетазул кумекалдалъун МухIамадица нилъее рицина жиндирго гIумруялъул тарихалъул хIакъалъулъги.
Каспийскалда выставка рагьана 16 февралалда ва халатбахъине буго 17 марталде щвезегIан. Гьениб лъун буго хIатIулгун ххамил, кагътил, пластикалъул кумекалдалъун авторас гьабураб 50-гIан хIалтIи.
Зарипат ТIагьирова