Гьале рагIалде щолеб буго 2020 сон. Дунялалъулго спортивияб бутIаялда кIудияб лъалкIги тун, унеб буго гьеб. Экспертаз, аналитиказ абулеб буго исана гIадинаб спорталъе икъбал гьечIеб сон ки- даниги букIун батиларинги. Гьеб битIарабги буго. ЛъагIалил байбихьуда бачIараб коронавирусалъул балагьалъ гьоркьор къотIизаруна дунялалдаго унел рукIарал киналго спортивиял тадбирал. ХIатта, Олимпиялъул хIаялцин рахъана 2021 соналде.
Олимпиада нахъе бахъиялъул хIужаби цереккунги рукIана, амма цого заманалда дунялалдаго киналго спортивиял тадбирал гьоркьор къотIизе тей букIараб жо гуро. Дагъистан ккола спорталъул къебелъи. Гьединлъидал спорталда сверухъ лъугьа-бахъунеб кинабго нилъедаги хъинтIичIого букIинищха.
Коронавирусалъ нилъер спорталъе гьабураб бищунго кIудияб зарал ккола дунялалдаго машгьурав тренер ГIабдулманап НурмухIамадов къадаралде щвей. Камуна Дагъистаналъе анцI-анцI чемпион куцарав, ММАялъул Олимплъун кколеб UFCлъул тIогьиве вас вачарав гьунар тIокIав инсан. Амма Аллагьасул къадаралда тIад рекъезе ккола. Руго Дагъистаналъул спорталда цо-цо рохизе ккарал хIужабиги. Дагьаб цебе Джастин Гэйтжиги къезавун UFC гIуцIиялъул рачел цIунана ХIабиб НурмухIамадовас. Гьеб букIана 2020 соналъ дагъистаниязе щвараб бищунго кIвар бугеб бергьенлъилъун. Республикаялъул эркенаб гугариялъул рахъалъ тIаса бищараб командаялъги улкаялъул ва дунялалъул даражаялда рихьизаруна цере рукIинчIел гIадинал лъикIал хIасилал. Коронавирусалъ лъугьинабураб хIалуцин чучлъарабго тIобитIараб эркенаб гугариялъул рахъалъ Рос- сиялъул чемпионаталда нилъер командаялъ ккуна тIоцебесеб бакI. АнцIгоялда гьоркьоса микьго меседил медальгун тIад руссана гьел чемпионаталдаса. Гьединалго хIасилал рихьизаруна Дагъистаналдаса атлетаз гьал къоязда Белградалда тIоритIарал эркенаб гугариялъул рахъалъ дунялалъул кубокалъе гIоло къецаздаги. АнцIго цIайиялъул категориялда гьоркьор рукIарал хIалуцарал къеркьеязул микьгоялда чIел босана нилъераз. ГIабдурашид Садулаевасул цебехъанлъиялда дунялалъул кубокгун тIад буссана Дагъистаналъул команда рехсараб турниралдаса.
Республикаялъул спортсменаз лъикIал хIасилал рихьизаруна боксалъул рахъалъги. Дагьаб цебе Оренбургалда букIараб Россиялъул чемпионаталда кIиго меседил медаль щвана нилъеразе.
91 кг цIайиялда чIел босана Россиялъул тIаса бищараб командаялъул капитан Муслим ХIажимухIамадовас. Гьенибго тIоцебесеб бакIалъе мустахIикълъана 75 кг цIайиялда цеве вахъунев цоги ракьцояв Жамбулат Бижамовги.
Боксалъул рахъалъ руччабазда гьоркьоб Ульяновскиялда тIобитIараб улкаялъул чемпионаталдаги Дагъистаналдаса кIиго спортсменкаялъе щвана меседил медалал.
69 кг цIайиялда бергьенлъи босана Россиялъул тIаса бищараб командаялъул капитан СагIадат ТIалхIатовалъ. Гьединго улкаялъул чемпионкалъун яхъана 75 кг цIайиялда цее яхъуней Зенфира МухIамадгIалиеваги.
Футболалъул рахъалъ лъикIал хIасилал рихьизаруна «Краснодар» командаялъул мухъилъ хIалев дагъистанияв МухIамад-Шапи Сулеймановас. Дунялалда бищунго къуватаб турнирлъун рикIкIунеб чемпионазул Лигаялда хIалаго, гьес Испаниялъул «Севилья» командаялъе кьабураб гол рикIкIана 2020-2021-абилел соназул сезоналъул хасалил бутIаялъул бищунго берциназул цояблъун. Гьебгиха, рехсараб турниралда Криштиану Роналдугун Лионель Месси хIалел рукIаго.
Цоги ракIалда чIолеб хIужалъун хутIана Хасавюрталда 12 сон барав МухIамадрасул МухIамадовасдагун Станислав Сарянида гьоркьоб эркенаб гугариялъул рахъалъ букIараб рецIел босиялъулаб речIчIи. ТIоцебесеб нухалъ дагъистанияв бергьун вукIана. Доб мехалъ хIалбащадаб къагIидаялда гугарун рукIана гIисинал спортсменал. Гьаб нухалдаги МухIамадрасулица 10:0 хIисабгун къезавуна Сарян.
