17 ноябралда Сергей Меликов дандчIвана ДРялъул муфти, ДРялъул ГIалимазул советалъул председатель, шайих АхIмад апандигун, МахIачхъалаялъулгун Грозныялъул архиепископ Варлаамгун ва ягьудиязул жамгIиятазул цолъизабураб динияб гIуцIиялъул председатель Валерий Дибияевгун. Гьениб бицана диниял гIуцIабазулгун бухьенал гьариялъулги, власталъ гьезие квербакъиялъулги ва гIолилазе трабия кьеялъул рахъалъ цадахъаб хIаракат гIуцIиялъулги хIакъалъулъ.

Регионалъул бетIерас лъикIаб_лъун рикIкIана, миллаталъулгун диналъул хIисабги гьабичIого, хIажалъи-къварилъи ккарал дагъистаниязе диниял гIуцIабаз гьабулеб кумекги коронавирусалде данде къеркьолеб заманалда гьабураб гьезул хIаракатги.
Хадур данделъиялда мухIкан гьаруна власталъулги диниял вакилзабазулги цадахъал ишал, хасго кIвар буссинабуна «пачалихъалда ккарал киналниги лъугьа-бахъиназул церехъабилъун рукIунел» гIолилазулгун батIи-батIиял тадбирал гьаризе ккеялде.
ДандчIваялда гIахьаллъана ДРялъул бетIерасулгун ДРялъул хIукуматалъул администрациялъул нухмалъулев Алексей ХIасановги, ДРялъул хIукуматалъул председателасул заместитель Рамазан Жапаровги, ДРялъул миллияб политикаялъулгун диназул ишазул министр Энрик Муслимовги.