FaceBook  in  yt  rss

Классалищ дагьлъизарилел?

2019 соналъул хасалихъе хIукму гьабуна лъай кьеялъул идарабазул хал гьабиялъулъ хиса-басиял гьаризе. Гьелда бан хIадурун буго цо чанго нормативияб документ. Гьезул цоялъул проект лъун буго нор­мативияб правоялъул актазул порталалда. Кинал хиса-басиялха гьа­ризехъин ругел гьеб документалда рекъон?

Классалищ дагьлъизарилел?

 

 

Бицен гьабулеб документ кко­ла «Байбихьул гIаммабги, аслияб гIаммабги ва гьоркьохъеб гIаммабги лъай кьеялъул аслиял програм­мабазда рекъон лъай кьеялъу­лаб хIаракат гIуцIиялъулгун гьеб гIумруялде бахъинабиялъул низам тасдикъ гьабиялъул хIакъалъулъ» абураб РФялъул Лъай кьеялъул ми­нистерствоялъул приказ. Рехсараб приказалдалъун хIакъикъияб гу­реблъун рикIкIуна 2013 соналъул 30 августалда къуватаблъун лъугьараб приказги хадубккун гьелда гьарун рукIарал хиса-басиялги.

 

РФялъул Лъай кьеялъул мини­стерствоялъ тIибитIизабулеб бугеб цIияб приказалда бицунеб буго цIали гIуцIулел къагIидабазулги, дарсазда кьезе кколеб материалалъ­улги, лъай кьеялъул программаба­зулгун хIалтIизаризе бегьулел тех­нологиязулги хIакъалъулъ. Рехсон буго гьелда классалда гIодор чIезе ругел лъималазул къадарги, рокъ­обе кьезе кколеб тIадкъаялъул нор­мативги ва цогидабги.

 

 

Цебеккунисеб приказалдаса абизегIанасеб батIалъиго гьечIо цIиялъул. Хиса-баси гьабун буго гIицIго 18-абилеб пункталда - гьелда би­цунеб буго классалда чан чи гIодов чIезе бегьулебали. 2013 соналъул приказалда хъван букIана гьадин: «Унтарал яги цIалуда хадур гъоларел лъимал цIалулеб класс батичIони, дарсида гIодов чIезе бегьуларо 25-ялдаса цIикIкIун цIалдохъан», - абун. ЦIияб приказалда хъван буго: «Классалда (группаялда) гIодор чIолел цIалдохъабазул къадар чIезабула санитариялгун эпидемиялъ­улал къануназдаги СанПиналъул нормативаздаги рекъон», - абун. Гьелде тIадеги, цебеккунисеб доку­менталда букIана пункт 18.1. Гьелда рекъон, «санагIатал шартIал ругони, цо-цо дарсазда, курсазда, модулазда класс бикьизе бегьулаан группабаз­де». ЦIияб документалдаса гьединаб пункт тIубанго нахъе бахъун буго.

Щиб гьелъие гIилла? Хал гьаби­лин СанПиналъул. Приказалда абу­леб буго, классалда 25-ялдаса гIемер цIалдохъан вукIине бегьуларин абун. Гьелдаго цадахъ рехсон руго нормативалда рекъон кабинеталъул рукIине кколел квадратиял метраби­ги: тIолабго классалъе цадахъго дарс кьолеб бугони, цо цIалдохъанасе букIине ккола кIигогун бащдаб ква­дратияб метра ва группаялъе дарс кьолеб бугони - лъабгогун бащдаб квадратияб метра. Гьелде тIадеги, нормативазда хIисабалде босун гьечIо кабинеталда жанир рукIунел шкафаз ва цогидаб къайиялъ кколеб бакI. ТIоцебесеб партаялдаги клас­салъул хъорщодаги гьоркьоб тезе ккола кIиго метрагун кIикъого сан­тиметралъул манзил.

 

ЦIияб приказалда рекъон классалда вукIине бегьула 25 цIалдохъан, амма кабинеталъул гIатIилъи букIине ккола лъабкъоялда кIигогун бащдаб квадратияб метраялда­са дагь гуреб. Кабинеталда лъолеб къайи хIисабалде босани - гьелда­саги гIатIидаб.

 

 

Гьанже ургъеха, Дагъистаналъ­ул чан школалда ругел цIияб при­казалда рекъон цIали гIуцIизе санагIатал шартIал? Кин цIунилел СанПиналъул тIалабал гIемер цIалдохъаби ругеб школалда? МахIачхъалаялда гIезегIан руго 35-40 цIалдохъан вугел классал. Кин рекъезабилеб гьезул цIали цIиял тIалабазде? РекъезабичIони, шко­лалъул администрациялъухъа гIакIа бахъила. ШартIал гьечIони, цIалдохъаби рокъорейищха ритIилел, кабинетал гIоларинги абун? 2013 соналъул приказалъ школалъ­ул директорал дагьалниги цIунулел рукIана Роспотребнадзоралъ гIакIа бахъиялдаса. Гьанже, ай цIияб про­ект къабул гьабун хадуб, гьелъие рес хутIулебго гьечIо.

 

ЦIияб приказалда гьечIо пункт 18.1 - гьелъ ихтияр кьолаан класс группабазде бикьизе. Щибаб классалда 25 цIалдохъан таниги, гIеладай кабинетал школалда? Пандемиялда бан Роспотребнадзоралъ тасдикъ гьарурал нормативаздаги абулеб буго цо классалда 15-ялда­са гIемер цIалдохъан вукIине бегьуларин абун. Гьедин гьабуни, кабинеталги гIоларо, ралагьизе ккола учительзабиги. Класс-комплектазул къадар гIемерлъараб ме­халда цадахъго гIемерлъула дарсал- сагIтазул къадарги. Гьел дарсал кьезе тIадеги учительзаби ралагьани, школалъул моцIрол харжазул фондалде кисан бачIине бугеб тIадеги гIарац?

 

Гьединал захIматал суалалгун хIадурлъулел руго республикаялъул школал цIияб цIалул соналде.

Прочитано 121 раз Последнее изменение Вторник, 11 августа 2020 09:56

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий обязанности главного редактора:

Умахан Амирханович Умаханов

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх