ЧIарада районалъул ЦIулда росдал аслияб лъай кьеялъул школалъул учительзабаз хIаракат бахъула цIалдохъабазе камилаб лъай кьезе.Гьединазул мухъилъ йиго Хадижат Бариеваги.
2004 соналда ДГПИялъул географиялъулгун туризмалъул факультетги лъугIизабун ячIарай гьелъ кIвар кьола цIалдохъабазул лъай камил гьабиялде, умумузулгун бухьен щулалъизабиялде. Щибаб соналда районалда тIоритIулел олимпиадабазда цересел бакIал ккола Хадижатил цIалдохъабаз.
2016 соналда гьей гIахьаллъана «ЛъагIалил учитель» абураб районалъул конкурсалда ва гьениб ккуна кIиабилеб бакI. ГIахьаллъана «Самый классный классный» абураб конкурсалдаги – гьенийги мустахIикълъана кIиабилеб бакIалъе.
Хадижат йиго лъикIай гIуцIарухъанги – Магъар росдал школалда тIобитIулеб ОГЭялдагун ЕГЭялдаги гьелъ лъола жигараб бутIа. Школалда тIоритIула КВНал, «географиялъул анкьал» ва цогидалги тадбирал.
* * *
ЦIулда росдал школалда хIалтIулей йиго ингилис мацIалъул учительница Мадина ЖабрагIиловаги.
ХIалтIулаго лъагIел гурого балеб гьечIониги, Мадинаца хIаракат бахъулеб буго лъималазда ингилис мацI малъизе.
Мадина йиго гIамал-хасият рекъарай мугIалим, цIалдохъабазги гьелъул хIурмат гьабула. Гьелъул цIалдохъабаз районалда тIоритIулел ингилис мацIалъул олимпиадабазда цересел бакIалги ккола.
