Исана тIоцебесеб нухалда тIобитIана «ЦIалдохъабазул эбел-инсуца историялъул ЕГЭ кьеялъул цогояб къо» абураб ТIолгороссиялъул акция. Гьелда гIахьаллъана ДРялъул лъай кьеялъул ва гIелмуялъул министр Уммупазил ГIумароваги.

 

ЕГЭ кьеялъул цогояб къоялъул аслияб мурад ккола хIакъикъияб экзамен тIобитIиялъул къагIидаялъулгун цIалдохъабазулгун гьезул умумузул, гьединго жамгIияталъул лъай-хъвай гьаби.

— Акция тIобитIизе ракIалде ккана ва гIумруялде бахъинабуна Рособрнадзоралъ. Гьелъул аслияб мурад буго ЕГЭялъукьа хIинкъизе кколареблъи цIалдохъабаздаги гьезул эбел-инсудаги бичIчIизаби. ЕГЭялде хIадурлъулаго, лъимал ракIчIун рукIине ккола жидерго лъаялда. Гьеб ишалъулъ кумекалъе рахъине ккола лъималазул эбел-эменги, — ян бицана Уммупазил ГIумаровалъ.
Исана школа лъугIулел цIалдохъабазул эбел-инсуда бихьана ЕГЭ тIобитIулаго гIуцIулел тадбиразул тартиб. Гьеб цIунун букIана эбел-инсуца ЕГЭ кьураб къоялъги. Историялъул ЕГЭ кьуна Дагъистаналъул шагьаразда: МахIачхъалаялда – №13 гимназиялда, Дербенталда – Дунялалъул культураялъул гимназиялда, Избербашалда – № 1 гьоркьохъеб школалда, Гъизляралда – №7 школалда, Хасавюрталда – №12 школалда.