Щулаго къай рачел

РФялъул Лъайкьеялъул министерствоялъул сайталда лъун буго исана кьезе ругел пачалихъиял экзаменазул расписание

Пачалихъиял экзаменал байбихьизе руго 27 маялда ва ахирисеб букIине буго тIоцебесеб июлалда. Амма гьеб заманалда экзамен кьун бажаричIел цIалдохъабазе рес кьолеб буго цогидал къоязда гьел кьезе. Гьел къоялги ккола 17 июналдаса тIоцебесеб июлалде щвезегIан.
ЕГЭялъул аслияб бутIаялда экзаменал кьезе руго исана школаги колледжгун техникум (гьоркьохъеб махщалил лъайкьеялъул идара) лъугIулел цIалдохъабазги цересел соназда экзамен кьун бажаричIел яги щварал хIасилаздаса рази гьечIел цIалдохъабазги. Экзамен кьезе рес буго къватIисел улкабазда лъайкьеялъул идара лъугIизабурал гIолилазеги.

Аслияб бутIаялъул расписание

27 май, итни: география, литература.
29 май, талат: математика (базовиябги профилиябги даража).
31 май, рузманкъо: история, химия.
3 июнь, итни: гIурус мацI.
5 июнь, талат: къватIисел улкабазул мацIал (хъвавул бутIа), физика.
7 июнь, рузманкъо: къватIисел улкабазул мацIал (кIалзул бутIа).
8 июнь, шамат: къватIисел улкабазул мацIал (кIалзул бутIа).
10 июнь, итни: обществознание.
13 июнь, хамиз: биология, информатика ва ИКТ.

Нахъраталил къоязул расписание

БатIи-батIияб гIилла сабаблъун, аслияб заманалда ЕГЭ кьезе рес ккечIел цIалдохъабаз экзаменал кьезе руго цогидаб мехалда. Масала, экзамен кьолеб къоялда унтун вукIун ватани, цIалдохъанас бихьизабизе ккола тохтурас кьураб кагъат (справка).
Рехсараб заманалда экзамен кьезе ихтияр кьола чарагьечIого, ай аттестат щвезе ккани, кьолел экзаменазухъ кIийилаб къимат щварал цIалдохъабазеги. Гьединаллъун ккола гIурус мацIалъулги математикаялъул базовиябги экзаменал. Гьел экзаменазда бищун дагьаблъун чIезабураб баллниги щвечIони, аттестаталдаса махIрумлъула.
Гьелго къоязда экзамен кьезе буго тIасарищарал экзаменал цадахъ ккарал цIалдохъабазги. Масала, биологиялъулги информатикаялъулги экзамен тIасабищарав цIалдохъанасухъа кIиябго кьун бажариларо, гьел цо къоялъ рукIиналда бан. Гьединлъидал цо экзамен кьезе буго аслияб заманалда, кIиабилеб – цогидаб къоялъ. ТIасабищараб экзаменалъухъ лъикIал баллал щвечIони, гьеб кIиабизеги кьезе ихтияр щола гIицIго тIасияб соналда.
17 июнь, итни: география ва литература.
18 июнь, талат: история ва физика.
20 июнь, хамиз: биология, информатика ва ИКТ, химия.
24 июнь, итни: базовиябги профилиябги даражаялъул математика.
26 июнь, талат: гIурус мацI.
27 июнь, хамиз: къватIисел улкабазул мацIал (кIалзул бутIа).
28 июнь, рузманкъо: обществознание ва къватIисел улкабазул мацIал (хъвавул бутIа).
1 июль, итни: киналго экзаменазул нахъраталил къо.

Цоги нухалда кьеялъул заман

Сентябралдаги рес буго ЕГЭ кьезе. Гьелъие ихтияр кьола гIурус мацIалъулги базовияб даражаялъул математикаялъулги экзаменазухъ чIезабураб бищун дагьаб балл щвечIел цIалдохъабазе.
3 сентябрь, талат: гIурус мацIалъул пересдача.
6 сентябрь, рузманкъо: базовияб даражаялъул математикаялъул пересдача.
20 сентябрь, рузманкъо: базовияб даражаялъул математикаялъулги гIурус мацIалъулги пересдача.