Эбел-инсуцаги кьуна ЕГЭ

 

    Дагъистаналда тIобитIана «Эбел-инсуца ЕГЭ кьеялъул цогояб къо» абураб акция. Гьелда гIахьаллъана исана гьоркьохъеб школа лъугIулел цIалдохъабазул эбел-эмен, муниципалитетазул бутIрул, лъай кьеялъул управлениязул нухмалъулел, школазул директорзаби, жамгIиятчаг ва журналистал. Тадбиралда гIахьаллъана ДРялъул лъай кьеялъул ва гIелмуялъул министр Уммупазил ГIумароваги.

   Анлънусгоялдаса цIикIкIун цIалдохъанасул эбел-эмен гIахьаллъана гIурус мацIалъул экзаменалда. Гьениб бицана экзамен тIобитIулеб къагIидаялъул хIакъалъулъ, бихьизабуна видеокамера кин хIалтIизабулебали ва ракIалде щвезабуна экзамен къабул гьабулеб пункталда букIине кколеб низам. Малъана экзаменалъул бланк цIезабулеб къагIидаги.

   «Дица халгьабуна экзаменалъул тесталъухъ. РакIалде ккола лъималазухъа гьел тIуразарун бажарилин абун. ЛъикIаб иш буго ЕГЭ тIобитIулеб къагIидаялъулгун цIалдохъабазул эбел-инсул лъайхъвай гьаби. Гьезие рес щвела ЕГЭялъукьа хIинкъизе кколареблъи ва тIадкъаял тIуразаризе бажарулеблъи лъималазда бичIчIизабизе», — ян бицана У. ГIумаровалъ.

   К. СУЛЕЙМАНОВА