ЦIияб реабилитациялъулаб центр

Сахлъи

 

Дагъистаналъул медуниверситеталъул ректор Сулейман Маммаев дандчIвана туберкулезалъул централияб гIелмиябгун цIех-рехалъул институталъул директор Атажан Эргешовгун. Гьез бицана Дагъистаналда гьуърузул унтаби сахгьариялъул цIияб центр рагьиялъул ва гьенир хIалтIизе тохтурзаби ралагьиялъул хIакъалъулъ. ЦIияб централда къваригIине руго фтизиатрал, пульмоногал, хирургал. 

Сулейман Маммаевас абуна республикаялдаса студентал цIализе ритIизе кколила Россиялъул централиял вузазде, цIали лъугIарабго, Дагъистаналде тIадруссине къотIи-къайги гьабун.

Россиялъул тохтурзабазул дагъистаниязе кумек

Республикаялде рачIун рукIана Россиялъул СахлъицIуниялъул министерствоялъул тохтурзаби. Гьез аслияб къагIидаялда халгьабуна рекIел унтабаз унтаразе гьабулеб бугеб медицинаялъулаб хъулухъалъул даражаялъул. Россиялъул СахлъицIуниялъул министерствоялъул кардиологиялъул гIелмиябгун цIех-рехалъул миллияб институталъул тохтур Олег Нарусов щвана республикаялъул централияб больницаялде. Гьес лъай-хъвай гьабуна рентгенохирургиялъул отделениялъул хIалтIул, гьабуна унтаразулгун гара-чIвари. Гьединго балагьана унтарасе гьабулеб операциялъухъ.
— Дагъистаналъул тохтурзабазул хIакъалъулъ дир лъикIаб пикру хутIана. Гьанир руго жидерго ишги бокьулел, унтаразул тIалаб-агъазги бугел тIадегIанаб махщалилаб даражаялъул тохтурзаби, — ян абуна Олег Нарусовас.
Гьединго Москваялдаса гьобол щвана республикаялъул кардиологиялъул централдеги МахIачхъалаялъул №1 больницаялдеги.

Медицинаялда — цIирагьиял

Гьанже республикаялда гьаризе байбихьун руго цере гьарулел рукIинчIел операциял. Масала, Дагъистаналъул хирургаз сахгьаризе кIоларел рищалабазул бакIалда лъолел руго имплантал. Гьелъул хIакъалъулъ бицана республикаялъул ортопедиялъулгун травматологияб централъул бетIерав тохтурасул заместитель ТIагьир Ражабовас. ТIоцебесеб гьединаб операция гьабуна Гъизляр районалдаса 66 сон барай Лидия Волошиналъе. Централъул бетIерав тохтур Марат Къадиевас бицухъе, клиникаялда, операциял гьарулаго, соналдаса соналде хIалтIизарулел руго цIиял технологиял. Цере гьединал операциял республикаялда гьарун бажарулароан.
Масала, исана рохокъотIи бекарав анцIго чиясе гьабуна операция. Улкаялдаго къанагIат гурони гьаруларо гьединал операциял. Жакъа централда вуго рохокъотIи сах гьабулев кIиго тохтур. Россиялдагицин гьезул къадар, цогидал тохтурзабазде дандеккун, дагьаб буго. Цебе рохокъотIи бекарал сакъаталлъунгицин хутIулаан. Жакъайин абуни, цIиял технологиязул кумекалдалъун, унтарал сахгьарун бажарулеб буго.
Шамай Хъазанбиева