Mesed clinic централда хIалтIулел тохтурзабазухъе унтарал гIемер рачIуна
ЦIодорай, гIакъилай, гIамал берцинай, сабурай, пагьму-гьунар бугей, гIадамазе кумекалъе кидаго хIадурай. Гьадинай йиго гьаб макъалаялда бицен гьабулей Меседу Гъазалиева. Гьей ккола Гумбет районалъул МелъелтIа росулъа. Эмен ХIажи ХIусенов ва эбел Роза ГIабдурахIманова гIемерал соназ хIалтIулел руго тохтурзабилъун. Гьездаса щвана Меседухъеги ирсалъе унтараздехун букIунеб адабги рокьиги.
Тохтурзабазул хъизамалда гIолей Меседуда гIемер рагIулаан эбел-инсуца рокъобги унтаразул бицунеб. Гьелъ жинцаго гьадин ракIалдещвезабуна:
— Районалъул больницаялда хIалтIулев вукIин гуребги, инсул пиша букIана гIелмуялда хурхарабги. Районалде гIемер рачIунаан улкаялъул батIи-батIиял бакIаздаса тохтурзаби. Инсуца гьел кидаго рокъоре рачун рачIунаан. РачIунан нижехъе Москваялдаса, Пятигорскалдаса, Америкаялдаса тохтурзаби. Цо-цо дидаги рагIулаан гьез медицинаялъулги тохтурлъиялъулги хIакъалъулъ бицунеб хабар. Дие бокьулаан гьезухъ гIенеккизе. Ва тохтурлъун яхъине бугеб анищ къоялдаса къоялде щулалъулеб букIана дир рекIелъ. Тохтурлъун яхъине бугеб дир анищ жеги чIаго гьабуна имгIал Лабазан ХIажиевичас. Гьев хIалтIулев вукIана МелъелтIа гьоркьохъеб школалда математикаялъул учительлъун. Гьес кидаго абулаан дида дун тохтурлъиялъе йижарай гIадан йигилан, — ан.
Эбел-инсуца кIудияб кIвар кьолеб букIана ясалъул цIалуде. Ахир-къадги тIубана Меседул анищ — гьей яхъана Дагъистаналъул медуниверситеталъул студенткалъун. Лъабабилеб курсалда цIалулей гьей цадахъго хIалтIулей йикIана МахIачхъала шагьаралъул больницаялда. Меседуе дарсал кьолей республикаялъул централияб больницаялъул гинекологиялъул отделениялъул заведующая Нателла Набиевналъ гьей ячунаан жиндаго цадахъ унтаразе операциял гьаризе. ЦIали лъугIун хадуб, гIолохъанай тохтур кIиго соналъ хIалтIана гIагараб МелъелтIа росулъ.
Меседул ракIалдещвеяздаса…
Тохтурлъиялъул тIоцересел къоял… Ругьел щвана мадугьалихъ бугеб Игьали росулъа лъимаде йигей гIадан захIматго унтун йигилан. Тохтурзаби хIинкъулел рукIана гьелъие операция гьабизе тIаде босизе. Амма дир рекIее рахIат букIинчIо, берда цее гIолохъанай чIужугIадан хвезе тезе. Ва дун битIккеялде кIудияб нигатгун операция гьабизе хIадурлъана. Гьеб букIана дица жавабчилъи цIикIкIараб тохтурлъиялде тIамураб тIоцебесеб захIматаб гали. Къисматалъ хIалбихьулеб букIана дир. Дица хвасар гьабураб гIумру — гьеле дие бищунго тIадегIанаб шапакъат. Дир доб мехалда букIана 26 сон.
Москваялде сапар
Меседул махщалил ва унтараздехун бугеб адабалъул бицунеб букIана гьей лъалелщиназ. Лъай камил гьабизе эбелгун цадахъ Меседу ана Москваялде. Москваялъул тохтурзабазул гьариялдалъун, Меседу цIализе лъугьана мединституталъул акушерлъиялъул ва гинекологиялъул факультеталъул аспирантураялде. Факультеталъул нухмалъулев ГIамирхан Торчиновас абулаан Меседу йигила кафедраялъул аспирантазда гьоркьой цого цо аспирантка, унтарал сах гьарун ва гьезие операция гьабун бажарулей тохтурилан. Гьеб тIадегIанаб къимат гIолохъанай тохтуралъе кьуна, гьелъ дипломалъулаб хIалтIи цIунулелъул.
Меседу росасе индал, бетIергьанчи Къасумидаги бичIчIула лъадул хIалтIул жавабчилъи, гьединлъидал гьесги хIаракат бахъула гьелъие сундулъго кумек гьабизе, бокьараб ахIвал-хIалалда гьей йичIчIулевлъун вукIине. Буго гьезул кIиго лъимерги: васги ясги.
Меседул захIматалъулаб биографиялъул тIохьода раккана цIиял тIанчал. Диссертация цIунун хадуб, гьей хIалтIизе лъугьана Москваялъул №13 больницаялъул гинекологиялъул отделениялде (гьенибго диссертацияги цIунана гьелъ). Лъималги гьарун рокъой йигей гьелда гIемер гьарулаан гьелде ругьунлъарал унтараз хIалтIизе яхъайилан. Ва Меседу хIалтIизе лъугьана Москваялъул клиникаялде.
ЦIиял анищал ва жийго
бетIергьанаб клиника
Заманалдасан Меседудаги ракIалде ккола жийго бетIергьанаб клиника рагьизе. Меседуца гьенире хIалтIизе рачана махщел камилал тохтурзаби. Гьел киналго ккола медицинаялъул гIелмабазул кандидаталги. Mesed cluhic централда хIалтIулел ругел тохтурзабазухъе унтарал гIемер рачIуна. Гьедин бугониги, тохтурзаби руго цIакъ сабурал, гьез кIваркьун гIинтIамула унтараз бицунелъухъ. Тохтурзабазда бичIчIула жидехъ хьулгун ралагьун чIарал унтаразул гIумруялде бугеб рокьи тIадбуссинабизе жидеда тIадаб бугеблъи.
Цоги гали цебехун
Тохтурлъиялдаго цадахъ цогиги проект гIумруялде бахъинабулеб буго Меседуца. Гьелъ рагьана Meced_beauty абураб салонги.
Бокьун буго захIмалъабазукьа хIинкъуларей Меседу Гъазалиевалъе гьабулелъулъ икъбал, махщалие дагьабги камиллъи гьаризе. Биччанте унтараздехун бугеб рокьуца къалъизаризе гьелъул гIумруялъул нухал.
ПатIимат Расулова,
«РИА Новости»
