FaceBook  in  yt  rss

Булбулалъул кочIол хIасратал саринал

Театр – гIумруялъул матIу

 

Араб анкьалда МагIарул театралъул артистаз бихьизабуна И. Юзеевасул пьесаялда рекъон лъураб «Булбулалъул кечI» абураб спектакль. СалихI Имангъоловасго лъун букIараб гьелда кIиабилеб рухI гъуна ХIайбула ГIабдулгъапуровас.

ЦIидасанги сценаялдасан гIоли-лазда кIалъана билулеб бугеб намус, гьеб хIинкъулеб букIана насихIатал гьаризегицин. ГIумруялъул бецIаб бокIнилъ кьеризабун бугеб загIипаб гьеб къабул гьабизе щивго хIадур вукIинчIо. Амма спектакль байбихьаралдаса лъугIизегIан гIодулеб намусалъул гьаракь сородулеб букIана. БухIулеб бугеб гьелъул махI чIвараб кинигин, кватIараб кантIиялъ ахиралда тIуркIизаруна больницаялда унтун регун ругел гIолилал. Гьезул палатаялъуве вачIуна ункъабилев унтаравги - ХIамзалов (Россиялъул мустахIикъав артист ХIусен Казиев).
Къваридаб каламги, пашманаб балагьиги, ургъел гьечIолъиялъ унтараб сверухълъиги, тIабигIаталдехун бугеб хашаб бербалагьиги – гьеб киналъго ракI унтизабурав КIудияб ВатIанияб рагъул бахIарчи ХIамзаловасул рекIел угьиялъухъ гIинтIамидал, гIодулеб букIана яхI. Гьесда цадахъ палатаялъур регун рукIарал унтарал рукIана цIакъго согIал гIоркьилал. ХIамзаловас гьезие бицунеб букIана кIудияб гIелалъул адаб гьабизе, аралъул къимат гьабизе, тIабигIат цIунизе ккеялъулги хIакъалъулъ.
ХIамзаловас унтаразул цояв гIолиласда ракIалдещвезабулеб букIана эбелалъухъе щвезе ине заман кидаго букIине кколин лъималазулилан. Рохьихъан ХIамзалов гIорцIулев вукIинчIо булбулалъул хIасратаб кочIол берцинлъиялъул хIакъалъулъ бицун. Кинха гьеб бичIчIилеб букIараб яхIалда кьаву чIван бугел гIолилазда (артистал – ХI. Хасаев, С. Батиров, М. ГIабдулатIипов).
Гьенибго бихьизабуна гIолилазул цо рихьарабго кколеб рокьиги ХIамзаласулги гьесул Шамалалъулги даимаб рокьиги (Шамалай – Дагъистаналъул мустахIикъай артистка ПатIимат Казиева).
Ахиралда херав чIалгIарал гIоркьилаз гIарза хъвала жидеда аскIоса гьев нахъе вачейилан. Цинги, къвалакь къандалъоги ккун, херав живго уна нахъе. Ва гьеб лахIзаталъ цояв гIолилав-унтарав кантIула. Намусалъ гIадалъ хъат кьабарав гьев ви-гьана ва цогидаздаги бичIчIизабула жидецаго херасул гьабичIеб адаб. Ва гьел цадахъ уна ХIамзалов тIадвуссинавизе. Амма кватIун ккана – гьебсагIаталда тохтурас лъазабула херав хванилан. Амма хвезе гьечIо булбулалъул даимлъиялде араб кечI. Биччанте гьеб кочIол абадиял сариназ чIаго гьабизе чIунтулеб гIумруги гIолилазул къасдалги. Биччанте булбулалъул роцIараб гьаракьгун цадахъ гьезухъе тIадбуссине эбел-инсуде бугеб гIищкъуги, лъималазде бугеб рокьиги, рокьул цIурал ракIазулъан цIидасанги гьимизе билизехъин бугеб намус. ГIицIго гьелъулъ буго инсанияталъул хвасарлъи.
Дида гьенибго ракIалдещвана театралъул артистка Майсарат ГIабдулмажидовалъ бицарабги.
- «Я къвал бала, я къоно чIвала» спектаклялдаса хадуб чанги лъимал ана магIарухъ хутIарал эбел-эмен жидедаго аскIоре шагьаралде рачине. Гьеб рагIараб мехалда, цо дун йохун йикIараб куцха. Гьеле гьелъулъ буго театралъул къуват», - илан абуна гьелъ.
Щиб лъалеб, гьаб спектаклялдаса хадубги цо-цониги гIолилал кантIизеги бегьула.
Гьединго спектаклялда ролал хIана М. НурмухIамадовас (тохтур), Майсарат ГIабдулмажидовалъ (санитарка), Разият Дибировалъ (медсестра).

Прочитано 140 раз Последнее изменение Вторник, 06 августа 2019 11:20
Другие материалы в этой категории: « Театралъул ватIаналда Миллаталъул цолъи »

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий объязанности главного редактора:

Умахан Амирханович Умаханов

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх