ГIажаибаб жо буго инсанасул гIумру. Цин гьулчун бачIуна, жиндирго карачелалгун, цинги гIодобцуна, жинцаго гьабуралда ракIги бухIун. Цо-цо нухалда гьелдаги кIочон толеб буго жиндиего лъикIлъи гьабурал гIадамал.
Жиндир адабги гьабуларел, гIодобги лъун, жиндаго тIад расандулезе, талихIалъул къвачIаги баччун, дандего бекерун уна гьеб. Цо-цо нухалда гьелдаги рагIулеб гьечIо «ГIумру, бокьула мун дие!» — йилан ахIи балезул гьаракь. Рагьдухъ хасалихълъиги буго, гьелъул берцинлъиялдаса гIорцIуларого дунги йиго. ГIинтIамун гIенеккаразда рагIизе буго меседил кьер чIварал тIанхазул ахирисеб хIухьелалъул угьи. ТIубараб рииялъ гьел тIанхаз рагIад кьуразда рагIулеб гьечIо гьезул зигара. Мерхьунаго гьелгун, унел руго гIадамал. Гьезие ургъелцин гьечIо гъутIбуздаса рортунго рортун рачIунел тIанхазул.
— Инсан, щай дуца малакь мерхьунел цо къоялъгIаги дуе кумекалъе ратарал тIанхал?
— КIудияб пайдайищ дие гьездаса букIараб. ГъутIбиги тIанхалги дагьалищ ругел ракьалда. Гьел ина, гьезул бакI кквела цогидаз, дагьалги берцинал тIанхаз.
Ана тIанхал гьороца росун. Цогидалин абуни, гIадамаз мерхьун, ракьалда тIупана, лъабабилел гьаваялда женжедилел руго. Гьединал, тIанхазе захIматал лахIзатаз, лъиданиги ракIалдещвечIо дагьаб цебегIангицин жидее гьездаса букIараб пайда. ГIадамаз пикру гьабулеб буго бачIунеб соналъ рижизе ругел тIанхазул. Гьезулги, гьайгьай, букIина жакъа гьал тIанхазул гIадаб къисмат.
ГIажаибаб жоха гьаб гIумру бугеб! Лъукъун буго божилъи. Галадана ритIухълъи. ЗагIиплъана гьуинлъи. Гьел тIанхазда релълъараб къисмат буго нилъерги, гIадамал! Кидал нилъ ругьунлъилел гIумру каранде къазеги къисмат беэдизеги? Кидалдай ричIчIилел нилъ цоцазда. ГIумруги гIадамалги!
Хасалихълъиялда цадахъго речIан унел руго пикрабиги. Щиб лъалеб, бачIунеб ихалъ гьелги цIилъизе ратила.
— Хасалихълъи, щай духъ рокьи ккун букIунеб киназулго? Щай мун киназго кIодо гьабулеб? ТIабигIаталъе цIилъиялъул хулжаги цIун бачIунеб гьайбатаб ихалъулги тIогьолаб роолги бутIагойищха гьечIеб дур гьарзалъи-бечелъиялъулъ. Гьез гурищ дуе гьаб кинабго сайигъат гьабураб? Щибха ккараб алъул? Гьезул цIаргицин рехсоларо, дур тIадегIанлъиялъул бицунелъул. ДуцагогIаги щай гьел ракIалдещвезаруларел!?
— Дицаги мисал гIадамаздаса босулеб бугоха.
— Нагагьлъун рии-их бигъани, щибха гьабилеб дуца?
— ГIумруялъ малъила гьебги.
