Гьанже ругел ясаца къабул гьабе дир салам

Магь баччизе гьод гурел, гьир баччизе жан гурел,

Мугъзада гIеретI чIвачIел, чIар щибали лъаларел,
Лъаларин, кIоларилан кIалдиб рагIи ругьунал!
Гьанже ругел ясаца къабул гьабе дир салам,
Рахьги хIанги бокьулел, бокьалъул махI рихарал,
ГIака бечIчIизе ккани, рачI кквезе мун тIамулел,
Нагагь хIалтIи малъани. мугъзалъе гьури кколел,
Гьанже ругел ясаца къабул гьабе дир салам
Бихьанщинаб бокьулел, бокьанщинаб гьабулел,
Бугеб рахIат гIоларел, гIарцул къимат лъаларел,
КъваригIараб жибго тун тезе ккараб гьабулел,
Гьанже ругел ясаца къабул гьабе дир салам.
Росасул адаб гьечIел, эбел- инсул кIвар гьечIел,
Пигура хвелин хIинкъун, лъимадуй керен кьечIел,
Киниялда лъимер лъун сонек чIван бажаричIел,
Гьанже ругел ясаца къабул гьабе дир салам.
МагIарул гIадат рехун, гIурус гьабун хьвадулел,
Рахьдал мацI кIочене тун, чидар лъазе гьабулел,
Щибаб лага тIатине, тIад къараб ретIел ретIун,
Рихьизелъун хьвадулел, ясаз босе дир салам,
ГIундузде ток бачунел, телалъ рокьи гьабулел.
КигIан бокьичIониги, къабул гьабе дир салам.