2021 соналдаса нахъе отпускалъухъ, больничниялъухъ ва декреталъухъ гIарац кьезе буго Социалияб страхованиялъул фондалъ. Гьедин хъвалеб буго РФялъул ЗахIматалъул министерствоялда хIадурулеб бугеб законалъул проекталда.
Законалда хиса-басиял гьариялъул аслияб мурад буго щивав чиясе страховияб гIарац кьей ва гIадамазе гьабулеб хъулухъ камил гьаби. Гьел хиса-басиязул рахъкквезе хIадурго руго Пачалихъияб Думаялъул гIемерисел депутаталги.
ЦIияб законалъул пайда букIине буго хIалтIи кьолезеги: гьез ургъел гьабизе ккеларо гьединал ишазе гIарац тIокIлъизабизе ккеялъул ва щивав хIалтIухъанасулги ракIчIараб букIина унтаниги, лъимер гьабуниги, яги отпускалде аниги, Социалияб страхованиялъул фондалдаса букIине кколеб роценалда гIарац щвеялда.
«ГьабсагIаталда гIадамал хIинкъулел руго больничнияб тIамач босизе яги декреталъулаб отпускалде ине. Гьелъие гIиллаги ккола хIалтIи кьолесулгун дагIба ккезе бегьулеблъи. ЦIияб законалъ хисизабизе буго гьединаб хIал», — ан баян кьуна «Единая Россия» партиялъул депутат Андрей ГIисаевас.
