ТIадегIанав Аллагьасул цIар — улкаялъул документалда.
Нилъер республикаялъул муфтияталъ рахъккуна РФялъул Конституциялда хиса-басиял гьарулаго гьенибе Аллагьасул цIарги босизе ккелилан цебеккунго патриарх Кириллица загьир гьабураб пикруялъул.
Киналго халкъал гIагар гьариялъе сабаблъун ккелин гьебилан абуна муфти АхIмадхIажи-афандияс.
«Улкаялъул бищун аслияб закон хIисабалда, Конституциялъ жанире рачине ккола гIадамазул рухIияб напсалъул хаслъабиги. Щивав чиясул дин батIияб букIаниги, БетIергьан нилъер цохIо вуго. Биччанте Гьесул цIарги букIине киназего гIаммаб пачалихъалъул законалда. Цоцазда гьоркьоб гьуинлъиги цIикIкIине, халкъалги гIагар гьаризе, баракат букIиналъе батаги нилъ рижарав Халикъасул цIар Конституциялда», — ян абулеб буго республикаялъул муфтияс.
Амма жибго Конституциялда хиса-басиял гьариялда тIасан гIадамазул батIи-батIиял пикраби руго.
