Бергьенлъигун тIадруссана

13-15 декабралда Севастополалда тIобитIараб «IT-Fest» информациязулал технологиязул регионазда гьоркьосеб тIоцебесеб фестивалалда гIахьаллъана Россиялъул «Кванториум» абурал лъималазул технопарказул цIалдохъаби.

Гьенир гIуцIун рукIана батIи-батIиял тайпабазул къецал: «InBio» (биология ва экология, гьединго гьел гIелмабазда цIех-рехал гьарулаго, инновациялъулал технологиял хIалтIизари), «InCity» (гIакъилаб шагьар, шагьаралъул инфраструктура гIуцIулаго, цIиял технологияздаса пайда боси), «InEducation» (нейротехнологиялда, геймификациялда, рикIкIадасан цIали гIуцIиялда ва цогидал рахъазда цIиял технологиял хIалтIизари), «EyePeople» (хIикматал гIадамал, EyeTracker абураб технологиялъул кьучIалда сакъатал гIадамазе хIалтIизаризе санагIатал приложениял хIадури) ва гь.ц.
Дагъистаналъул цIалдохъабаз хIадурун букIана шагьаразул къватIазда видеохалкквей чIезабиялъул проектги жанив чи гьечIого, ралъдал тIинуялъул халгьабулеб аппаратги.
Проектазулъ хIалтIизабураб цIи-яб къагIидаялъухъ дагъистаниял мустахIикълъана «Северсталь» абураб ПАОялъул хасаб призалъе.