Вацлъиялъул бухьенал

Татьяна Гамалей дандчIвана Ставрополь краялда вугев Дагъистаналъул вакилгун

 

Татьяна Гамалейицаги ГIабдула ГIумаровасги бицана Северияб Кавказалъул кIиябго регионалъул бухьенал щулалъизариялъул мурадалда гьаризе кколел тадбиразул хIакъалъулъ.
ГIумаровас бицана, республикаялъул вакиллъиялъулги МухIамад-СалихI Гусаевасул цIаралда бугеб Дагъистаналъул халкъазул регионалияб централъулги, Ставрополалда ругел Дагъистаналъул халкъазул гIолилазул жамгIияб гIуцIиялъулги, Дагъистаналъул халкъазул миллиябгун маданияб автономиялъулги цадахъал ишазул хIакъалъулъ. «ГIемер хIалтIи гьабулеб буго туризмалъулги инвестициязулги рахъаз бухьенал гьариялъул мурадалдаги. Жигаралда тIоритIулел руго экстремизмалдасаги терроризмалъул идеологиялдасаги Дагъистаналъул гIолилал рикIкIалъизариялъул мурадалда гIуцIулел тадбиралги», — ян абуна гьес.
Татьяна Гамалейица бицана жамгIиял гIуцIабазул вакилзабазе министерствоялъ гьабулеб кумекалъулги, дармилгун экономикиялги, маданиялгун гуманитариялги, туризмалъулги рахъаз бухьенал камил гьаризе ккеялъулги хIакъалъулъ.

Щуго сонилаб «амнистия»

Дагъистаналда букIине буго хасаб низам

Токалъухъ мухь босиялъул рахъалъ Дагъистаналъе чIезабулеб буго щугосонилаб хасаб низам. Гьединаб хIукму гьабуна дагьалъ цебе РФялъул энергетикаялъулги транспорталъулги министрасул заместитель Вячеслав Кравченкол нухмалъиялда гъоркь тIобитIараб видеоданделъиялда.
Гьелда гIахьаллъана ДРялъул энергетикаялъулги транспорталъулги министр Сайгидпаша ГIумахановги, «Дагестанская сетевая компания» АОялъул управляющий директор МуртазагIали ГьитIинасуловги, цогидалги.
Данделъиялда бицана Дагъистаналъул потребителазе ток, цогидал регионазулазде дандеккун, учузго бичизе бугилан.
Муса Азаев