Лъимал — нухазда

ТалихIкъосарал ишал ккечIого рукIине

Лъималазда чара гьечIого малъизе ккола нухазда хьвадиялъул

Гьоркьоса къотIичIого МахIач­хъалаялъул УМВДялъул ОГИБДДялъул хIалтIухъабаз шагьаралъул школазул цIалдохъабазда бицуна нухазда низам цIунизе кколеблъиялъулги нух бахунаго тIадал ишазулги хIакъалъулъ. Гьеб бициналъе гIиллаги буго, нух­къотIун унаго, лъимал машинабазде гъоркье кколел рукIиналъул хIужаби гIемерлъулел рукIин. Масала, исана сон байбихьаралдаса нахъе нухазда авариял ккеялъул хIасилалда лъукъа-къотIана 21 лъимер. Бищунго цIуна-къазе ккола балугълъиялде рахинчIел лъимал. ГьабсагIаталдаги Госав­тоинспекциялъул бищунго кIвар цIикIкIараб хIалтIилъун кко­ла лъималазул гIумруялъе хIин­къигьечIолъи букIинаби. Нухазда ккарал лъугьа-бахъиназул хIа­силалда лъимер хвей яги лъукъи ккола хъизамалъулго къварилъи. Гьединлъидал щивав чияс гьабизе ккола цIодорлъи. Шоферзабазги цIунизе ккола нухазда хьвадиялъул низам, гьабизе ккола саб­ру, гIедегIун машина бачиналъ, талихIкъосарал лъугьа-бахъинал кколеблъи кIочене бегьуларо.
Нухазда хьвадиялъул низам хве­забиялъул мисал, тIоцебесеб иргаялда, бихьизабулеб буго чIа­хIияз. Гьез светофоразухъцин сан­гьабулеб гьечIо.
ХIурматиял ракьцоял! Нилъеда бараб буго лъималазул букIинесеб къисмат. Нилъее киназего бокьула лъимал цIодорал, лъай-гIакълу бугеллъун лъугьине, амма гьебго заманалда нилъецаго кумекги гьабула лъималазул гIумру бигъиналъе.
ХIурматиял шоферзаби! КIвар­кье лъималазде, нухазда гьезул хIинкъигьечIолъи цIуниялде — лъимал гIодорчIезе рихьизарурал хасал бакIал руго маршруткабазда жанир, гьелде тIадеги цадахъго руго хIинкъигьечIолъи цI­унулел рачелалги. Гьел хIалтIи­зариялъухъги халгьабе.
Радик ХIапизов,
МахIачхъала шагьаралда бугеб РФялъул
УМВДялъул ОГИБДДялъул пропагандаялъул инспектор

Лъазаби

«ЦIияб бербалагьи»
ГIолилазухъа бажаризе ккола жакъасеб къоялъул
лъугьа-бахъиназе ритIухъаб къимат кьун

«ГIолилазул дунял» абураб регионазда гьоркьосеб жамгIияб гIуцIиялъги, Россиялъул Транспорталъул министерствоялъги, Россиялъул генералияб прокуратураялъги, Россиялъул нухазда хIинкъигьечIолъи цIуниялъул рахъалъ МВДялъул бетIераб управлениялъги лъазабулеб буго «ЦIияб бербалагьи» абураб социалияб рекламаялъул рахъалъ тIолгороссиялъул конкурс.
Конкурсалъул аслиял темаби руго гьадинал:
1) «Ришватчилъиялде данде къеркьей».
2) «Транспорталда хIинкъи­гье­чIолъи цIуни — щивасул ва киназулго иш».
3) «Жавабчилъи бугев донор».
4) «Медицинаялъул тIадегIанаб хъулухъалъе киназего руго ресал».
5) «Нухазда хIинкъигье­чIолъия­лъул рахъккола гIолилаз».
Къецалда гIахьаллъизе бегьула 14-30 сон барал гIолилал. Гьеб тIобитIулеб буго 2009 соналдаса байбихьун. Гьелъие кьучI лъурав Евгений Мартыновас абулеб буго гIолилазухъа бажаризе кколила жакъасеб къоялъул лъугьа-бахъиназе ритIухъаб къимат кьунги, социалиялгун экономикиял суалал тIуразарунгиян.
ХIалтIаби къабул гьарула 2018 соналъул 20 сентябралде щве­зегIан, конкурсалъул хасаб сайталда бугеб «Социалияб плакат», «Социалияб видеоролик» абураб кIиго номинациялда рекъон.
Дагьабги мухIканго къецалъул хIакъалъулъ цIализе бегьула гьаб сайталда: http://tvoykonkurs.ru/about/docs