ЦIибил бакIаризе байбихьана республикаялда. Исана лъик1аб бачIин бакIаризе ракIалда буго цIолбохъабазда. Кинабниги 22000 гектаралда бекьун буго цIибил. ГьабсагIаталда бакIарун бахъана 2800 гектаралда бижараб нигIмат. Араб соналда республикаялда бакIарун букIана 208000 тонна. Гьеб букIана республикаялъул цIолбохъанлъиялъул тарихалда босараб чIел.
ДРялъул Росдал магIишаталъул министерствоялъул нухмалъулесул заместитель Шарип Шариповас абуна, цIолбохъанлъиялъул рахъалъ нилъер улкаялда къабул гьабураб цIияб законалда рекъон, Россиялда чагъирин абизе бегьулин гIицIго нилъер цIолбол хIадур гьабу ралда. ЦIияб законалъ рес кьунин нилъер цIолбохъанлъи цебетIезабизе.
— Россиялъул чогърохъабазул цIибил гIезабулел жидерго ракьал гьечIелъул, гьезул киназулго кIвар буссун буго нилъер республикаялде. Гьелдаса нилъги рази руго. Рази рукIинарищ, ахирал соназда цIолбол оптовияб багьа 18 гъурщидаса тIаде унеб букIинчIелъул. Гьанже рес щвана ахикьанго гьеб нигIмат 25-27 гъурщиде кило гьабун бичизе, — ян абуна Шарип Шариповас.
