ХъахIилаб цIатари месед гурелъул

Ахираб заманалда Дагъистаналъул водительзабазул рахIат хвезабун буго газ хиралъулеб букIиналъ.

    МахIачхъалаялъул заправкабазда гьелъул багьа бахун буго 37 гъурщиде. ЦIех-рех гьабураб заманалда баянлъана улкаялъул цогидал регионаздаги газалда сверухъ ахIвал-хIал нилъер гьанибго гIадаб букIин.
     Амма цогидал бакIазда Дагъистаналда гIадин гIемер гьечIо газалда хIалтIулел машинаби. Гьелъги батила, республикаялъул водительзабазда гьеб суал цIакъго унтун бугеб.
    ХIатта, республикаялда газ бичулел заправкабазда дандечIеялцин унел руго. Водительзабаз хIукму гьабун буго гьеб учузлъизегIан бензин хIалтIизабизе. Газ хиралъиялъе гIиллалъунги цо-цо экспертаз  рикIкIунеб буго ЦIияб Уренгоялда цIатариялъул заводалда цIа ккей.
   Гьезулго пикруялда рекъон, газ учузлъизе рес гьечIо къватIисел пачалихъазде бичулеб цIатариялъул къадар дагьги гьабун гьеб жанибехун буссинабичIони.