ХIабиб НурмухIамадов мустахIикълъана UFCялъул чемпионасул рачелалъе

 

UFC гIуцIиялъул рачелгун Дагъистаналде тIадвуссана ХIабиб Нур­му­хIамадов. Гьесда дандчIвай гьабизе МахIачхъалаялъул аэропорталде дан­делъун вукIана азаргоялдасаги цIикIкIун чи. Гьезда гъорлъ рукIана НурмухIамадовасул гIагарлъиги, гьудул-гьалмагъзабиги, хIакимзабиги, спортсменалги, жубараб речIчIухъанлъи бокьулелщиналги.

Спортсменасул эмен ГIабдулманап НурмухIамадовас, данделъараздехун вуссун, гьадин абуна: «Баркала киназего, дир васги кIодо гьавун, гьанире рачIаралъухъ. ХIабибие щвараб бергьенлъи ккола киназего гIахьалаблъун. Баркула киназдаго», — ян.
Аэропорталда ХIабиб НурмухIа­мадовасда бергьенлъи баркана Дагъистаналъул хIукуматалъул председатель Артем Здуновасги. «ХIабиб, Россиялъул тарихалда меседил хIар­паз хъвана дур цIар. ТIоцебесеб нухалъ гуро дуца Россиялъулги Да­гъистаналъулги цIар дунялалдаго рагIизабулеб бугеб. Гьелъухъ кIудияб баркала. Хадурккунги гьарула бергьенлъаби», — ян абуна премьер-министрас.
ДРялъул Халкъияб Собраниялъул председателасул тIоцевесев заместитель СайгидахIмад АхIмадовасги баркана чемпионасда гьесие щвараб къиматаб бергьенлъи. Спорталъул ва физкультураялъул министр МухIамад МухIамадовасул рагIабазда рекъон, Дагъистан цебегоялдаса балагьун чIун букIана UFCялъул рачелалъухъ. «Гьеб рохел халкъалъе, жубараб речIчIухъанлъи бокьулезе сайгъат гьабурав ХIабибие баркала буго. Щивав гIолохъанав спортсменасе гьарула ХIабиб гIадал рахъине сахлъиги, икъбалги, гьунарги», — ян абуна министрас.
Данделъиялда гIахьаллъарав Олим­­­­пиялъул чемпион ГIабду­ра­шид Са­дулаевасги баркана Нур­му­хIа­ма­до­васда бергьенлъи.
Хадуб, аэропорталде рачIарал киназего баркалаги кьун, кIалъазе ва­хъа­на чемпион ХIабиб Нур­мухIамадовги. «Дун цIакъ вохаравги чIухIаравги вуго Дагъистаналъул халкъалдаса. Баркала буго нужее гьанире рачIаралъухъ. Дунялалъул кинаб бакIалда вукIаниги, дида ракIалда рукIуна Дагъистанги нилъер­го гIадамалги. Къеркьей букIана захIматаб. Нужеда бихьанаха ахираб анкьалъ букIараб ахIвал-хIал, дида данде вахъине спортсмен валагьулаго, UFCялъул вакилзабазда бихьараб захIмат. Гьеб киналъго тIадецуй гьабулеб букIана. Гьелъги батила, къеркьолелъул, унго-унгояб махщел бихьизабизе бажаричIебги. Аллагьасе рецц, кинабго лъикI ккана», — ян абуна чемпионас.
ХIабиб НурмухIамадов ккола UFCялъул рачелалъе муста­хIи­къ­лъарав Россиялдаса тIоцевесев спортсмен. 1995 соналда Олег Тактаровги вахъун вукIана UFC гIуцIиялъ тIоритIулел турниразул чемпионлъун. Амма доб заманалда гьенир къагIидабиги турниразул регламентги рукIана тIуранго батIиял.
Киназдаго лъала, UFCялъ къеркьеязда цебе турниразухъ балагьулел цIикIкIине мурадалда батIи-батIиял сихIраби ургъулеблъи. Гьаб нухалъги гьедин ккана. ХIабиб НурмухIамадовасдагун Артем Лобовасда гьоркьоб ккараб хабар гIу­цIиялъул вакилзабаз дунялалдаго рагIизабуна ва гьелда сверухъ ки­нофильмалъе гIураб сценарийги ургъана. UFCялъ ва цогидалги гьединалго гIуцIабаз турниразде хIадурлъулелъул цоцаздехун лъикIаб бербалагьи гьечIел спортсменал дандчIвазе гьукъула ва гьезда хадуб халкколел хасал чагIигицин рукIуна. Амма, ХIабиб НурмухIамадовасулгун Артем Лобовасул цоцаздехун ццим букIин лъалеб букIаниги, гьел данд­чIвазе риччана, хIатта гьеб ишалъе кумекгицин гьабун батизе бегьула. Радиоялдасан кIалъалаго, абурал рекъечIел рагIабазухъ, гьес нагIадала кколеб букIаниги, Лобовасул гъванщилъ жо бана ХIабибица. Гьелдаса нахъе байбихьана ахIи-хIур. Лобовасул гьалмагъ Макгрегор, жиндирго къапилагун, тIаделъана дагъистанияв рекIун вукIараб автобусалде ва гьелъие зарал гьабуна. ХIабибин абуни UFCялъул хIалтIухъабаз автобусалдаса къватIиве виччачIо. Лъугьа-бахъиналъул хIасилалда гьебго турниралда цере рахъине кколел рукIарал Майкл Кьезае ва Рэй Боргие сакъат ккана. Макгрегорин абуни полициялъулаз жанив лъуна. Гьелде тIадеги, ахирисеб къо щвезегIан лъалеб букIинчIо НурмухIамадовасда данде къеркьезе вугев спортсменасул цIар. БитIараб нухдасан унаго, гIодовги речIчIун, хIатIие сакъат ккарав Фергюсонил бакIалда дагъистаниясда данде вахъине лъиего бокьун букIинчIо. Ахир-къадги UFCялъул мухъилъ ватарав ракI къамартIав чи, американав Эл Яквинтаца лъазабуна жив хIадур вугин. Къеркьей халатбахъана щуго раундалъ, ай 25 минуталъ, ва судияз бергьенлъи кьуна ХIабибие.
Дагъистанияв американавгун къер­­­кьана жиндиего зарал кколареб къагIидаялда, гIодоввиччан. Абизе ккола, дандияс кьабураб цогIаги зар я мал ХIабибида щвечIин. ТIадагьаб цIайиялда UFCялъул бищунго къуватал спортсменазул сияхIалда гье­чIониги, НурмухIамадовасулгун бу­кIа­раб дандчIваялда Яквинтацаги би­хьизабуна жив бигьаго къуркьулездаса гуреблъи. Къеркьей лъугIун хадуб ХIабибица гьесие лъикIаб къиматги баркалаги кьуна.
Темирхан ХIасанов