17 марталда РФялъул Федералияб собраниялъул Федерациялъул советалъул вице-спикер Иляс ГIумаханов нахъе ана гьеб хъулухъалдаса.
Гьесул бакIалде тIамуна Халкъазда гьоркьосел ишазул рахъалъ комитеталъул нухмалъулев Константин Косачев.
ГIумахановасе кьуна цIияб хъулухъ — 2022 соналъ диназда гьоркьосеб диалогалъул мурадалда ТIолгодунялъулаб конференция ахIиялъе гьабулеб хIадурлъиялъул рахъалъ Федерациялъул советалъул хасав вакиллъун тана гьев.
И. ГIумахановасда цIияб хъулухъги баркулаго, гьанжелъизегIан гьабураб хIалтIуе баркалаги кьун, спикер Валентина Матвиенкоца абуна заманаялъ нахъе виччалев вугин, амма рикIкIалъизе теларин.
Федерациялъул советалда нилъер республикаялъул вакиллъун Иляс ГIумаханов вукIана 2001 соналдаса нахъе. Вице-спикерасул хъулухъалде гьев тIамуна 2010 соналъул декабралда.
З. ХIАЖИЕВА
